"மைக்கேல் முசாசி" படத்தில் நடிக்கும் பிக் பாஸ் போட்டியாளர்!

சென்னை,

அறிமுக இயக்குநர் ஷாம் ரோட்ரிக்ஸ் இயக்கத்தில் தயாராகும் முதல் திரைப்படம் 'மைக்கேல் முசாசி'. ஆக்சன் எண்டர்டெய்னர் ஜானரில் தயாராகும் இந்த திரைப்படத்தில் 'நடனப்புயல்' பிரபுதேவா கதையின் நாயகனாக நடிக்கிறார். சவாலான போலீஸ் அதிகாரி வேடமேற்றிருக்கும் பிரபுதேவாவிற்கு இந்த படத்தில் ஜோடியில்லை. இவருடன் நடிகர்கள் ஜான் விஜய், விடிவி கணேஷ், ஜார்ஜ் மரியான், மலையாள நடிகர் பினு பப்பு, மலையாள நடிகை லியோனா லிஷாய், அருள்தாஸ், நடிகர் 'மாஸ்டர்' மகேந்திரன், 'பழைய ஜோக்' தங்கதுரை, மகேஷ் உள்ளிட்ட பலர் நடிக்கிறார்கள். விக்னேஷ் வாசு ஒளிப்பதிவு செய்யும் இந்தப் படத்திற்கு, லியாண்டர் லீ மார்ட்டி இசையமைக்கிறார். இந்த படத்தை ஜாய் பிலிம் பாக்ஸ் எண்டர்டெய்ன்மெண்ட் என்ற பட தயாரிப்பு நிறுவனம் சார்பில் தயாரிப்பாளர் ஜான் பிரிட்டோ பிரம்மாண்டமான பொருட்செலவில் தயாரித்திருக்கிறார்.

'மைக்கேல் முசாசி' என வித்தியாசமாக பெயரிடப்பட்டிருக்கும் இந்த படத்தின் படபிடிப்பு நிறைவடைந்து இறுதிக்கட்ட பணிகள் விறுவிறுப்பாக நடைபெற்று வருகிறது. இந்த திரைப்படம் எதிர்வரும் கோடை விடுமுறையில் திரையரங்குகளில் வெளியிடுவதற்கு திட்டமிடப்பட்டு வருகிறது. இப்படத்தில் இடம்பெற்ற முதல் பாடல் சமீபத்தில் வெளியானது. இசையமைப்பாளர் லியாண்டர் லீ மார்ட்டி இசையமைப்பில், பின்னணி பாடகர் அந்தோணி தாசன் பாடியிருக்கும் இந்த பாடலுக்கு, நடன இயக்குநர் சாண்டி நடனம் அமைத்திருந்தார்.

'மைக்கேல் முசாசி' திரைப்படம் வரும் மார்ச் மாதம் வெளியாகுமென படக்குழு அறிவித்துள்ளது.

இந்நிலையில் பிக் பாஸ் சீசன் 8 நிகழ்ச்சியின் போட்டியாளரான சத்யா, பிரபுதேவா உடன் நடிக்க ஒப்பந்தமாகியுள்ளார்.

சின்ன திரையில் அண்ணா தொடரில் காவல் துறை அதிகாரியாக நடித்திருந்த சத்யா, பிரபுதேவா படத்தில் ராணுவ அதிகாரி வேடத்தில் நடிக்கிறார். .பிக் பாஸ் சீசன் 8 நிகழ்ச்சியின் போட்டியாளர்களில் ஒருவராக சத்யா பங்கேற்றார். இவர் இதற்கு முன்பு அண்ணா தொடரில் நடித்திருந்தார். பிக் பாஸ் போட்டியில் பங்கேற்பதற்காக தொடரில் இருந்து பாதியில் விலகினார்.

பிக் பாஸ் நிகழ்ச்சியில் தனக்கு மிகப்பெரிய அங்கீகாரம் கிடைக்கும் என்ற நம்பிக்கையில் இருந்த சத்யாவுக்கு தற்போது பட வாய்ப்புகள் தேடிவரத் தொடங்கியுள்ளன. ராணுவ வீரராக பிரபுதேவா உடன் சத்யா நடிக்கிறார். சத்யாவுக்கு பிரபலங்கள் மற்றும் ரசிகர்கள் பலர் வாழ்த்துகளைத் தெரிவித்து வருகின்றனர்.