பாஜக உறுப்பினர் சேர்க்கையில் நிர்வாகிகளுக்கு ஆர்வம் இல்லை - இலக்கை அடைவதில் சிக்கல்

மதுரை: தமிழகத்தில் பாஜக உறுப்பினர் சேர்க்கையில் நிர்வாகிகள் ஆர்வம் காட்டாமல் இருப்பதால், உறுப்பினர் சேர்க்கைக்கான இலக்கு பூர்த்தியாவதில் சிக்கல் எழுந்துள்ளது.

பாஜகவில் 6 ஆண்டுகளுக்கு ஒருமுறை உறுப்பினர்கள் புதுப்பித்தல் மற்றும் சேர்க்கை நடைபெறும். அதன்படி, தற்போது பாஜக உறுப்பினர் சேர்க்கை நடைபெற்று வருகிறது. தமிழகத்தில் நாடாளுமன்றத் தேர்தலில் பாஜக கூட்டணி 50 லட்சம் வாக்குகளுக்கு மேல் பெற்றதால், 2026 சட்டப்பேரவைத் தேர்தல் வெற்றியை மனதில் கொண்டு மொத்தமாக ஒரு கோடி உறுப்பினர்களை சேர்க்க வேண்டும் என, பாஜக தலைவர் அண்ணாமலை அறிவுறுத்தியிருந்தார்.