தொகுதி மறுசீரமைப்பு எந்த மாநிலத்திற்கும் தொகுதிகள் குறைக்ககூடாது: பிரதமர் மோடிக்கு ஜெகன் மோகன் ரெட்டி கடிதம்

சென்னை: தொகுதி மறுசீரமைப்பு விவகாரத்தில் எந்த மாநிலத்திற்கும் தொகுதிகள் குறைக்ககூடாது என பிரதமருக்கு ஜெகன் மோகன் ரெட்டி கடிதம் மூலம் வலியுறுத்தியுள்ளார். இது குறித்து ஆந்திர முன்னாள் முதல்வர் ஜெகன் மோகன் ரெட்டி பிரதமர் மோடிக்கு எழுதிய கடிதத்தில் கூறியிருப்பதாவது: தொகுதி மறுசீரமைப்பு என்பது சில மாநிலங்களின் அரசியல் பிரதிநிதித்துவம் மற்றும் பொதுமக்களின் உணர்வுகளில் தாக்கம் ஏற்படுத்தக்கூடியது. மக்கள் தொகை கணக்கெடுப்பு நடைமுறைக்குப் பிறகு, மாநிலங்களுக்கு மக்களவையில் இடங்களை ஒதுக்குவதையும், ஒவ்வொரு மாநிலத்தையும் பிராந்திய தொகுதிகளாகப் பிரிப்பதையும் அரசியலமைப்பு கட்டமைப்பு கட்டாயமாக்குகிறது. 2026ல் மக்கள் தொகை கணக்கெடுப்பு நடைமுறையின் முடிவைத் தொடர்ந்து ஒரு எல்லை மறுவரையறை செயல்முறை தவிர்க்க முடியாமல் தொடரும். இந்த அனுமானம் பல மாநிலங்களுக்கு, குறிப்பாக தென் மாநிலங்களுக்கு, கடுமையான பதட்டத்தை ஏற்படுத்தியுள்ளது, அவர்கள் தங்கள் பிரதிநிதித்துவம் குறைந்துவிடும் என்று அஞ்சுகிறார்கள்.

பல்வேறு மாநிலங்களில் மக்கள்தொகை கட்டுப்பாட்டு நடவடிக்கைகளின் விளைவுகளில் தொடர்ந்து நிலவும் ஏற்றத்தாழ்விலிருந்து கவலை வெளிப்படுகிறது. 1971ம் ஆண்டு இருந்த தென் மாநிலங்களின் மக்கள் தொகை, 2011ல் 4 சதவீதம் வரை குறைந்துள்ளது. இதற்கு தேசிய முன்னுரிமையாக இருந்த மக்கள்தொகை கட்டுப்பாட்டு திட்டத்தை செயல்படுத்துவதில் தென் மாநிலங்களின் நேர்மையின் விளைவாக இந்தப் பங்கு குறைப்பு ஏற்பட்டுள்ளது. ஐயா, இன்றைய நிலையில் மாநிலங்களின் மக்கள்தொகை அடிப்படையில் தொகுதிகளை மறுவரை செய்தால் தேசிய கொள்கை உருவாக்கம் மற்றும் சட்டமன்ற செயல்பாட்டில் தென் மாநிலங்களின் பங்கேற்பு குறையும். எனவே, எந்த மாநிலமும் பாதிக்கப்படாத வகையில், ஒவ்வொரு மாநிலத்துக்கும் விகிதாச்சார அடிப்படையில் தொகுதிகளின் எண்ணிக்கையை உயர்த்த சட்டத்திருத்தம் கொண்டு வர வேண்டுகிறேன்.

ஒவ்வொரு மாநிலத்திற்கும் விகிதாசார அளவில் இடங்களை அதிகரிப்பதை நடைமுறைப்படுத்த அரசியலமைப்பை திருத்த வேண்டியதன் அவசியத்தை நான் வலியுறுத்துகிறேன். மொத்த இடங்களில் அந்த மாநிலத்திற்கு ஒதுக்கப்பட்ட இடங்களின் பங்கின் அடிப்படையில், எந்த மாநிலமும் அதன் பிரதிநிதித்துவத்தில் எந்தக் குறைப்பையும் சந்திக்க வேண்டிய நிலை இல்லை என்பதை இது உறுதி செய்ய வேண்டும். நாட்டின் அரசியல், சமூக நல்லிணக்கத்தில் பாதிப்பு ஏற்படுத்தும் தன்மை கொண்ட விவகாரம் என்பதால், பிரதமர் தலையிட்டு தீர்வு காண வேண்டும்; மாநிலங்களின் அச்சத்துக்கு முடிவு கட்ட வேண்டும். இவ்வாறு ஜெகன் மோகன் ரெட்டி கூறியுள்ளார்.

The post தொகுதி மறுசீரமைப்பு எந்த மாநிலத்திற்கும் தொகுதிகள் குறைக்ககூடாது: பிரதமர் மோடிக்கு ஜெகன் மோகன் ரெட்டி கடிதம் appeared first on Dinakaran.