தஞ்சாவூர், கடலூர் உள்ளிட்ட பல்வேறு மாவட்டங்களில் பல்லாயிரம் ஏக்கர் பரப்பிலான நெற்பயிர்கள் நீரில் மூழ்கின

விருத்தாசலம் / தஞ்சாவூர்: தொடர் மழை காரணமாக பல்வேறு மாவட்டங்களில் பல்லாயிரக்கணக்கான ஏக்கரில் பயிரிடப்பட்டுள்ள நெற்பயிர் உள்ளிட்ட பயிர்கள் நீரில் மூழ்கியுள்ளதால் விவசாயிகள் கவலை அடைந்துள்ளனர்.

கடந்த 11-ம் தேதி முதல் கடலூர் மாவட்டத்தில் கனமழை பெய்து வருகிறது. ஆறுகள், ஓடைகள், வாய்க்கால்களில் மழைநீர் பெருக்கெடுத்து ஓடுகிறது. இதனால் பல்வேறு இடங்களில் விவசாய நிலங்கள் நீரில் மூழ்கியுள்ளன. தாழ்வான பகுதிகளில் வெள்ளம் வடியாத நிலையில் விளை நிலங்களை தண்ணீர் சூழ்ந்துள்ளது. மருதையாறு மற்றும் தொழுதூர் அணைக்கட்டில் திறக்கப்பட்ட தண்ணீரால் வெள்ளாற்றில் வெள்ளம் பெருக்கெடுத்துள்ளது. பெண்ணாடம், கருவேப்பிலங்குறிச்சி, வேப்பூர் பகுதிகளில் தாழ்வான இடங்களில் குடியிருப்புகளை மழைநீர் சூழ்ந்துள்ளது.