ஐசிசி மகளிர் பேட்டிங் தரவரிசை; ஸ்மிருதி மந்தனா நம்பர் 2: டாப் 10ல் நுழைந்த ஒரே இந்தியர்

லண்டன்: ஐசிசி மகளிர் ஒரு நாள் கிரிக்கெட் பேட்டிங் தரவரிசைப் பட்டியலில் இந்திய அதிரடி வீராங்கனை ஸ்மிருதி மந்தனா 2ம் இடத்தை பிடித்துள்ளார். சமீபத்தில் அயர்லாந்து மகளிர் அணிக்கு எதிராக நடந்த ஒரு நாள் போட்டிகளில் அந்த அணியினரின் பந்து வீச்சுகளை அநாயசமாக துவம்சம் செய்து ரன் மழை பொழிந்த இந்திய வீராங்கனை ஸ்மிருதி மந்தனா. இவர், 3வது ஒரு நாள் போட்டியில் அற்புதமாக ஆடி 135 ரன் குவித்தார். முதல் போட்டியில் 41, 2வது போட்டியில் 73 ரன் குவித்து அணியின் வெற்றிக்கு வலு சேர்த்தார். இதனால் நேற்று வெளியான மகளிர் ஒரு நாள் கிரிக்கெட் பேட்டிங் தர வரிசைப் பட்டியலில், 738 புள்ளிகள் பெற்று, 2ம் இடத்தை மந்தனா பிடித்துள்ளார்.

இந்த பட்டியலில் முதல் 10 இடங்களுக்குள் நுழைந்த ஒரே இந்திய வீராங்கனை மந்தனா தான். பட்டியலில் தென் ஆப்ரிக்கா வீராங்கனை லாரா உல்வார்ட், 773 புள்ளிகளுடன் முதலிடத்தில் உள்ளார். இலங்கை வீராங்கனை சமாரி அத்தப்பட்டு, 733 புள்ளிகள் பெற்று 3ம் இடம் பிடித்துள்ளார். அயர்லாந்துடனான 2வது ஒரு நாள் போட்டியில் சதம் விளாசிய இந்திய வீராங்கனை ஜெமிமா ரோட்ரிக்ஸ், தரவரிசை பட்டியலில் 17வது இடத்திலும் இந்திய அணி கேப்டன் ஹர்மன்பிரீத் கவுர் 15ம் இடத்திலும் உள்ளனர். ஆல் ரவுண்டர்களுக்கான தரவரிசைப் பட்டியலில் இந்திய வீராங்கனை தீப்தி சர்மா, 344 புள்ளிகளுடன் 6ம் இடத்தில் உள்ளார்.

ஆஸ்திரேலியா வீராங்கனை ஆஸ்லெ கார்ட்னர் முதலிடம் வகிக்கிறார். பந்து வீச்சாளர்களுக்கான தரவரிசை பட்டியலில் இங்கிலாந்தின் சோபி எக்லெஸ்டோன் முதலிடத்திலும் இந்திய வீராங்கனை தீப்தி 680 புள்ளிகளுடன் 4ம் இடத்திலும் உள்ளனர்.

The post ஐசிசி மகளிர் பேட்டிங் தரவரிசை; ஸ்மிருதி மந்தனா நம்பர் 2: டாப் 10ல் நுழைந்த ஒரே இந்தியர் appeared first on Dinakaran.