ஐ.பி.எல். வரலாற்றில் சிறந்த பந்துவீச்சை பதிவு செய்த முகமது சிராஜ்

ஐதராபாத்,

ஐ.பி.எல். தொடரில் ஐதராபாத்தில் நேற்று நடைபெற்ற லீக் ஆட்டத்தில் சன்ரைசர்ஸ் ஐதராபாத் - குஜராத் டைட்டன்ஸ் அணிகள் மோதின. இந்த ஆட்டத்தில் முதலில் பேட்டிங் செய்த ஐதராபாத் அணி 20 ஓவர்களில் 8 விக்கெட்டை இழந்து 152 ரன்கள் எடுத்தது. ஐதராபாத் தரப்பில் நிதிஷ் ரெட்டி 31 ரன் எடுத்தார். குஜராத் தரப்பில் சிராஜ் 17 ரன்கள் மட்டும் கொடுத்து 4 விக்கெட்டுகள் வீழ்த்தினார்.

தொடர்ந்து 153 ரன் எடுத்தால் வெற்றி என்ற இலக்குடன் களம் புகுந்த குஜராத் அணி 16.4 ஓவரில் 3 விக்கெட்டை மட்டும் இழந்து 153 ரன்கள் எடுத்து 7 விக்கெட் வித்தியாசத்தில் அபார வெற்றி பெற்றது. குஜராத் தரப்பில் சுப்மன் கில் 61 ரன் எடுத்தார். இந்த போட்டியின் ஆட்டநாயகன் விருது முகமது சிராஜுக்கு வழங்கப்பட்டது.

இந்நிலையில், நேற்றைய ஆட்டத்தில் 17 ரன்கள் மட்டும் கொடுத்து 4 விக்கெட்டுகள் வீழ்த்தியதன் மூலம் ஐ.பி.எல். வரலாற்றில் தனது சிறந்த பந்துவீச்சை சிராஜ் பதிவு செய்துள்ளார். இதற்கு முன்னர் கடந்த 2023ம் ஆண்டு பஞ்சாப்புக்கு எதிரான 21 ரன் கொடுத்து 4 விக்கெட் வீழ்த்தியதே அவரது சிறந்த பந்துவீச்சாக இருந்தது.

அதை தற்போது முகமது சிராஜ் முறியடித்துள்ளார். மேலும்,நேற்றைய ஆட்டத்தில் 4 விக்கெட் வீழ்த்தியதன் மூலம் முகமது சிராஜ் ஐ.பி.எல். தொடரில் 100+ விக்கெட்டுகளை வீழ்த்தி சாதனை படைத்துள்ளார் என்பது குறிப்பிடத்தக்கது.