இத்தாலி பார்முலா1 கார்பந்தயம்: நெதர்லாந்து வீரர் வெர்ஸ்டப்பென் முதலிடம்

இமோலா,

இந்த ஆண்டுக்கான பார்முலா1 கார்பந்தயம் உலகம் முழுவதும் 24 சுற்றுகளாக நடத்தப்படுகிறது. இதன் 7-வது சுற்றான இத்தாலி கிராண்ட்பிரி போட்டி அங்குள்ள சர்வதேச ஓடுதளத்தில் நேற்று நடந்தது. பந்தய தூரம் 309.049 கிலோ மீட்டராகும். வழக்கம் போல் 10 அணிகளைச் சேர்ந்த 20 வீரர்கள் இலக்கை நோக்கி மின்னல் வேகத்தில் காரில் சீறிப்பாய்ந்தனர்.

இதில் 2-வது வரிசையில் இருந்து புறப்பட்ட நடப்பு சாம்பியனான நெதர்லாந்தின் மேக்ஸ் வெர்ஸ்டப்பென் (ரெட்புல் அணி) 1 மணி 31 நிமிடம் 33.199 வினாடிகளில் இலக்கை கடந்து முதலிடம் பிடித்து அதற்குரிய 25 புள்ளிகளை தட்டிச் சென்றார். நடப்பு சீசனில் அவர் பெற்ற 2-வது வெற்றி இதுவாகும். அவரைவிட 6.109 வினாடிகள் பின்தங்கிய இங்கிலாந்து வீரர் லான்டோ நோரிஸ் (மெக்லரன் அணி) 2-வது இடத்தையும், ஆஸ்திரேலியாவின் ஆஸ்கர் பியாஸ்ட்ரி (மெக்லரன் அணி) 3-வது இடத்தையும் பிடித்தனர். 7 முறை சாம்பியனான இங்கிலாந்தின் லீவிஸ் ஹாமில்டன் (பெராரி அணி) 4-வது இடத்துக்கு தள்ளப்பட்டார்.

இதுவரை நடந்துள்ள 7 சுற்றுகள் முடிவில் ஆஸ்கர் பியாஸ்ட்ரி 146 புள்ளிகளுடன் முதலிடத்திலும், லான்டோ நோரிஸ் 133 புள்ளிகளுடன் 2-வது இடத்திலும், மேக்ஸ் வெர்ஸ்டப்பென் 124 புள்ளிகளுடன் 3-வது இடத்திலும் உள்ளனர். இதன் 8-வது சுற்று போட்டி மொனாக்கோவில் வருகிற 25-ந் தேதி நடக்கிறது.