3வது நாளாக தொடரும் டேங்கர் லாரிகள் ஸ்டிரைக் - சிலிண்டர் தட்டுப்பாடு ஏற்படும் அபாயம்

நாமக்கல்,

நாமக்கல்லை தலைமை இடமாக கொண்டு தென்மண்டல எல்.பி.ஜி. டேங்கர் லாரி உரிமையாளர்கள் சங்கம் செயல்பட்டு வருகிறது. அந்த சங்க உறுப்பினர்களின் டேங்கர் லாரிகள் மூலம் மத்திய அரசின் பொதுத்துறை எண்ணெய் நிறுவனங்களின் சுத்திகரிப்பு நிலையங்களில் இருந்து சமையல் கியாஸ் சிலிண்டர்களில் நிரப்பும் பாட்டிலிங் மையங்களுக்கு ஏற்றி செல்லப்பட்டு வருகின்றன.

ஏற்கனவே எண்ணெய் நிறுவனங்களுடன் நடைமுறையில் உள்ள ஒப்பந்தம் ஆகஸ்டு மாதத்துடன் முடிவடைய உள்ளது. பின்னர் செப்டம்பர் மாதம் முதல் புதிய ஒப்பந்தம் நடைமுறைக்கு வர உள்ளது. இதனிடையே புதிய ஒப்பந்தத்திற்கான விதிமுறைகளில் சில தொழிலுக்கு பாதிப்பை ஏற்படுத்தும் வகையில் உள்ளதாகவும், எனவே விதிமுறைகளை தளர்த்த வேண்டும் எனவும் லாரி உரிமையாளர்கள் தரப்பில் கோரிக்கை வைக்கப்பட்டது.

அதைத்தொடர்ந்து பல்வேறு கட்ட பேச்சுவார்த்தைகள் நடத்தப்பட்டன. இருப்பினும் கோரிக்கைகள் நிறைவேறவில்லை. மேலும் கடந்த 24-ந் தேதி வரை எண்ணெய் நிறுவனங்களிடம் இருந்து டேங்கர் லாரி உரிமையாளர்களுக்கு சாதகமாக எந்த அறிவிப்பும் வரவில்லை. பின்னர் தென்மண்டல எல்.பி.ஜி. டேங்கர் லாரி உரிமையாளர்கள் சங்கம் சார்பில் நேற்று முன்தினம் முதல் கால வரையற்ற வேலை நிறுத்த போராட்டம் நடைபெறும் என அறிவிக்கப்பட்டது.

நேற்று முன்தினம் டேங்கர் லாரி உரிமையாளர்கள் வேலை நிறுத்த போராட்டம் தொடங்கியது. இதையடுத்து கோவையில் நடந்த இருதரப்பு பேச்சுவார்த்தையும் தோல்வி அடைந்தது. இதனால் நேற்று 2-வது நாளாக வேலை நிறுத்த போராட்டம் தொடர்ந்தது. அதன் காரணமாக நாள் ஒன்றுக்கு சுமார் ரூ.3 கோடி இழப்பு வீதம் 2 நாட்களில் ரூ.6 கோடி வரை இழப்பு ஏற்பட்டுள்ளதாக டேங்கர் லாரி உரிமையாளர்கள் தெரிவித்து உள்ளனர்.

இதுகுறித்து தென் மண்டல எல்.பி.ஜி. டேங்கர் லாரி உரிமையாளர்கள் சங்க தலைவர் சுந்தரராஜன், செயலாளர் செந்தில் ஆகியோர் கூறுகையில், "தமிழ்நாடு, புதுச்சேரி, கர்நாடகா, கேரளா, ஆந்திரா, தெலுங்கானா ஆகிய 6 மாநிலங்களில் வேலை நிறுத்த போராட்டம் காரணமாக டேங்கர் லாரிகளில் சமையல் கியாசை ஏற்றுவது முழுமையாக நிறுத்தப்பட்டுள்ளது. நாள் ஒன்றுக்கு குறைந்தபட்சம் 1,000 லாரிகள் முதல் அதிகபட்சமாக 1,500 லாரிகளில் கியாஸ் ஏற்றப்படவில்லை. ஆனால் ஏற்கனவே ஏற்றப்பட்ட சமையல் கியாஸ் அந்தந்த பாட்டிலிங் மையங்களில் இறக்கப்பட்டு வருகின்றன.

வேலைநிறுத்த போராட்டத்தால் நாள் ஒன்றுக்கு சுமார் ரூ.3 கோடி இழப்பு வீதம் 2 நாட்களில் ரூ.6 கோடி வரை இழப்பு ஏற்பட்டுள்ளது. இதேநிலை நீடித்தால் 4 நாட்களில் சமையல் கியாஸ் சிலிண்டர் தட்டுப்பாடு ஏற்படும். அதனால் மக்கள் பாதிப்பிற்கு உள்ளாகும் நிலை உருவாகும். அதற்குள் எண்ணெய் நிறுவன அதிகாரிகளிடம் இருந்து லாரி உரிமையாளர்களுக்கு சாதகமான தகவல் வரும் என நம்புகிறோம்" என்று அவர்கள் கூறினர்.

இந்நிலையில் தென் மாநிலம் முழுவதும் 3வது நாளாக டேங்கர் லாரிகள் ஸ்டிரைக் தொடர்ந்து நடைபெற்று வருகிறது. சுமார் 4,000-க்கும் மேற்பட்ட எல்.பி.ஜி. கேஸ் டேங்கர் லாரிகள் இயக்கப்படாமல் ஆங்காங்கே நிறுத்தப்பட்டுள்ளது. இதனால், தமிழ்நாடு உள்ளிட்ட தென் மாநிலங்களில் சமையல் எரிவாயு சிலிண்டர் தட்டுப்பாடு ஏற்படும் அபாயம் ஏற்பட்டுள்ளது.