11 மீனவர்களை விடுவிக்க இலங்கை முடிவு: இலங்கை அதிபரிடம் பிரதமர் பேசியது குறித்து வெளியுறவு செயலர் விளக்கம்

டெல்லி: சிறையில் உள்ள 11 மீனவர்களை விடுவிக்க முடிவு எடுக்கப்பட்டுள்ளதாக இலங்கை தரப்பில் தெரிவிக்கப்பட்டுள்ளது என வெளியுறவு செயலர் தெரிவித்துள்ளார். அரசு முறை பயணமாக பிரதமர் மோடி நேற்று இலங்கைக்கு வருகை தந்தார். இலங்கை வந்துள்ள பிரதமர் தமிழக மீனவர்கள் பிரச்னை, கச்சத்தீவு குறித்து தலைவர்களிடையே ஆலோசிக்கப்படுமா? என்ற எதிர்ப்பார்ப்பு எழுந்துள்ளது. அந்த வகையில் இன்று கொழும்பு நகரில் இலங்கை அதிபர் அநுர குமார திசநாயக உடன் பிரதமர் மோடி சந்திப்பு நடத்தினார். இலங்கை அதிபர் மற்றும் பிரதமர் மோடி முன்னிலையில், இரு நாடுகளுக்கு இடையே, புரிந்துணர்வு ஒப்பந்தங்கள் கையெழுத்தானது.

மேலும் தமிழக மீனவர்களை உடனடியாக விடுவிக்கவும், படகுகளை திரும்ப ஒப்படைக்கவும் வலியுறுத்தினார். இந்நிலையில் மீனவர் பிரச்சனை தொடர்பாக இலங்கை அதிபரிடம் பிரதமர் மோடி நடத்திய பேச்சுவார்த்தை பற்றி வெளியுறவு செயலாளர் விக்ரம் மிஸ்ரி விளக்கம் அளித்தார். மீனவர் பிரச்சனையை மனிதாபிமான அடிப்படையில் அணுக வேண்டும் என இலங்கை அதிபரிடம் பிரதமர் மோடி வலியுறுத்தினார். இலங்கை சிறையில் உள்ள மீனவர்களையும் படகுகளையும் விடுவிக்க வேண்டும் என்றும் பிரதமர் கேட்டுக்கொண்டுள்ளார். சிறையில் உள்ள 11 மீனவர்களை விடுவிக்க முடிவு எடுக்கப்பட்டுள்ளதாக இலங்கை தரப்பில் தெரிவிக்கப்பட்டுள்ளது.

மீனவர் பிரச்சனைக்கு இரு தரப்பும் ஏற்கும் வகையில் சுமூகத் தீர்வு காண அனைத்து மட்டங்களிலும் பேச்சுவார்த்தை முன்னெடுக்க முடிவு எடுக்கப்பட்டுள்ளது. இரு நாட்டு மீனவர்களின் கூட்டு நடவடிக்கை குழுவின் 6வது சுற்று பேச்சுவார்த்தை கடந்த அக்டோபரில் நடைபெற்றது. அடுத்த சுற்று பேச்சுவார்த்தைக்கான தேதியை முடிவு செய்வது குறித்து இரு தரப்பிலும் ஆலோசித்து வருகிறோம் என்று கூறினார்.

The post 11 மீனவர்களை விடுவிக்க இலங்கை முடிவு: இலங்கை அதிபரிடம் பிரதமர் பேசியது குறித்து வெளியுறவு செயலர் விளக்கம் appeared first on Dinakaran.