வணிகர்களுக்கு தமிழக அரசு எப்போதும் துணையாக இருக்கும்: தொழில் வர்த்தக சங்க விழாவில் முதல்வர் மு.க.ஸ்டாலின் உறுதி

மதுரை: வணிகர்களின் வளர்ச்சிக்கு தமிழக அரசு எப்போதும் துணையாக இருக்கும் என்று மதுரையில் நேற்று நடந்த தமிழ்நாடு தொழில் வர்த்தக சங்கத்தின் 100வது ஆண்டு நிறைவு விழாவில் முதலமைச்சர் மு.க.ஸ்டாலின் பேசினார். மதுரையை மையமாகக் கொண்டு 1924ம் ஆண்டு முதல் இயங்கி வரும் தமிழ்நாடு தொழில் வர்த்தக சங்கத்தின் நூற்றாண்டு நிறைவு விழா, மதுரை காமராஜர் சாலையில் உள்ள வர்த்தக சங்க அரங்கில் நேற்று நடந்தது. இதில் முதல்வர் மு.க.ஸ்டாலின் சிறப்பு விருந்தினராக கலந்து கொண்டு விழா மலரை வெளியிட்டு பேசியதாவது: தமிழ்நாடு தொழில் வர்த்தக சங்கத்தின் பவள விழாவில், அன்றைய முதலமைச்சர், கலைஞர் கலந்துகொண்டார். கலைஞர் பிறந்த ஆண்டும், இந்த வர்த்தக சங்கம் உருவான ஆண்டும் ஒரே ஆண்டுதான் என்று இங்கே உரையாற்றிய வர்த்தக சங்கத் தலைவர் ஜெகதீசன் தெரிவித்தார்.

கலைஞரின் நூற்றாண்டில், தமிழ்நாடு தொழில் வர்த்தக சங்கமும் நூற்றாண்டு நிறைவு விழா காண்பதற்காக வாழ்த்துகளை, பாராட்டுகளை தெரிவிக்கிறேன். சமச்சீரான, எல்லாருக்கும் எல்லாம் என்ற அடிப்படையிலான நம்முடைய அரசின் பயணத்தில், வணிகப் பெருமக்களான உங்களுடைய ஆதரவு மிக மிக முக்கியம். உங்களின் வளர்ச்சிக்கு நமது அரசு எப்போதும் உறுதுணையாக இருக்கும். மீண்டும் ஏதாவது கோரிக்கை உள்ளதா என்ற சந்தேகமே எனக்கு எழுகிறது. ஏனெனில், எல்லா கோரிக்கையையும் தமிழ்நாடு வணிகர் சங்க பேரமைப்பு தலைவர் விக்கிரமராஜா மற்றும் இங்குள்ள வணிகர் சங்க நிர்வாகிகள் அடிக்கடி என்னைச் சந்தித்து எப்படி பேச வேண்டுமோ, அப்படி பேசுவார்கள்.

எப்படி வியாபாரிகள் சாமர்த்தியமாக பேசி வியாபாரத்தை அதிகப்படுத்துவார்களோ, அதேபோல அரசிடம் சாமர்த்தியமாக பேசி, செய்யக்கூடிய ஆற்றல் அனைவருக்கும் இருக்கிறது. இங்கே வணிகர் சங்கத்தின் சார்பில் வைத்திருக்கும் கோரிக்கைகளை நிச்சயமாக, உறுதியாக பரிசீலித்து, அதனை நிறைவேற்றுவதற்குரிய நடவடிக்கை எடுக்கப்படும். நாங்கள் சொன்னதைதான் செய்வோம், செய்வதைத்தான் சொல்வோம் அதுவும் உங்களுக்குத் தெரியும். இவ்வாறு அவர் பேசினார். விழாவில் முதல்வருக்கு வணிகர்கள் சார்பில் வெள்ளி செங்கோல் வழங்கப்பட்டது. பின்னர் பல்வேறு கோரிக்கைகள் அடங்கிய மனுவையும், முதல்வரிடம் வணிகர் சங்கத்தினர் வழங்கினர்.

The post வணிகர்களுக்கு தமிழக அரசு எப்போதும் துணையாக இருக்கும்: தொழில் வர்த்தக சங்க விழாவில் முதல்வர் மு.க.ஸ்டாலின் உறுதி appeared first on Dinakaran.