முதல்வர் ஸ்டாலின் குறித்த ஆளுநர் மாளிகையின் பதிவு ‘அநாகரிகம்’ - இடதுசாரிகள் கண்டனம்

சென்னை: “தமிழக ஆளுநர் ஆர்.என்.ரவி தன்னுடைய எக்ஸ் பதிவில் தமிழகத்தின் முதல்வர் மு.க.ஸ்டாலின் அவரது முதல்வர் பதவியை குறிப்பிடாமல் ஒரு தனி மனிதராக பாவித்து ஒரு பதிவிட்டுள்ளார். இது கடும் கண்டனத்துக்குரியதாகும். எனவே, ஆளுநர் அடுத்தவர்களுக்கு அறிவுரை சொல்வதை விட்டுவிட்டு தான் குறைந்தபட்சம் பொறுப்புணர்வோடும் நாகரிகத்தோடும் நடந்து கொள்வதற்கு கற்றுக் கொள்ள வேண்டும்,” என்று மார்க்சிஸ்ட் கம்யூனிஸ்ட் கட்சியின் மாநில செயலாளர் பெ.சண்முகம் கூறியுள்ளார். இதேபோல், ஆளுநர் மாளிகையின் அநாகரிக அறிக்கையை வன்மையாக கண்டிப்பதாக, இந்தியக் கம்யூனிஸ்ட் கட்சியின் மாநில செயலாளர் இரா.முத்தரசன் கூறியுள்ளார்.

பெ.சண்முகம் (மார்க்சிஸ்ட் கம்யூனிஸ்ட்): “தமிழக ஆளுநர் ஆர்.என்.ரவி தன்னுடைய எக்ஸ் பதிவில் தமிழகத்தின் முதல்வர் மு.க.ஸ்டாலின் அவரது முதல்வர் பதவியை குறிப்பிடாமல் ஒரு தனி மனிதராக பாவித்து ஒரு பதிவிட்டுள்ளார். இது கடும் கண்டனத்துக்குரியதாகும். தமிழகத்தின் மரபின்படி தான் நிகழ்வின் இறுதியில் தேசிய கீதம் பாட முடியுமென்று சொன்னதை, தேசிய கீதமே பாட முடியாது என்று சொன்னதாக புரளி கிளப்புகிறார். நாளை வருகிற இன்னொரு ஆளுநர் இன்னொரு நேரம் பாட வேண்டுமென்று கேட்டால் அப்படி செய்ய முடியுமா?