முதல் டெஸ்ட்: வெஸ்ட் இண்டீசுக்கு சவாலான இலக்கு நிர்ணயித்த பாகிஸ்தான்

முல்தான்,

பாகிஸ்தான் - வெஸ்ட் இண்டீஸ் இடையிலான முதல் டெஸ்ட் போட்டி முல்தானில் நேற்று முன்தினம் தொடங்கியது. இதில் முதல் இன்னிங்சில் முறையே பாகிஸ்தான் 230 ரன்களும், வெஸ்ட் இண்டீஸ் 137 ரன்களும் அடித்தன.

பின்னர் 93 ரன்கள் முன்னிலையுடன் 2-வது இன்னிங்சை தொடங்கிய பாகிஸ்தான் 2-வது நாள் ஆட்ட நேர முடிவில் 3 விக்கெட்டுக்கு 109 ரன்கள் அடித்து 202 ரன்கள் முன்னிலை பெற்றிருந்தது. கம்ரான் குலாம் 9 ரன்களுடனும், ஷாத் ஷகீல் 2 ரன்களுடனும் களத்தில் இருந்தனர்.

இந்நிலையில் 3-வது நாள் ஆட்டம் இன்று நடைபெற்று வருகிறது. தொடர்ந்து பேட்டிங் செய்த பாகிஸ்தான் பேட்ஸ்மேன்கள், வெஸ்ட் இண்டீஸ் வீரர் ஜோமல் வாரிகனின் பந்துவீச்சை தாக்குப்பிடிக்க முடியாமல் சொற்ப ரன்களில் ஆட்டமிழந்தனர். மேற்கொண்டு 48 ரன்கள் மட்டுமே அடித்த பாகிஸ்தான் 2-வது இன்னிங்சில் 157 ரன்களில் ஆல் அவுட் ஆனது. இதன் மூலம் வெஸ்ட் இண்டீசுக்கு 251 ரன்கள் வெற்றி இலக்காக நிர்ணயிக்கப்பட்டுள்ளது. பாகிஸ்தான் தரப்பில் அதிகபட்சமாக ஷான் மசூத் 52 ரன்கள் அடித்தார். வெஸ்ட் இண்டீஸ் தரப்பில் ஜோமல் வாரிகன் 7 விக்கெட்டுகளை அள்ளினார்.

இதனையடுத்து 251 ரன்கள் அடித்தால் வெற்றி என்ற சவாலான இலக்கை நோக்கி வெஸ்ட் இண்டீஸ் களமிறங்கியுள்ளது.