மாநகர போக்குவரத்துக் கழகத்தில் புதிய நியமனம் எப்போது? - சென்னையில் சேவை பாதிக்கும் அபாயம்

சென்னை: மாநகர போக்குவரத்துக் கழகத்தில் பணி ஓய்வு உள்ளிட்ட காரணங்களால் ஊழியர்களின் எண்ணிக்கை தொடர்ந்து குறைந்து வருகிறது. இதனால் சேவை பாதிக்கும் சூழல் ஏற்பட்டுள்ளது.

மாநகர போக்குவரத்துக் கழகம் சார்பில் சென்னை மற்றும் புறநகரில் 672 வழித்தடங்களில் 3,200-க்கும் மேற்பட்ட பேருந்துகள் இயக்கப்பட்டு வருகின்றன. இவற்றை இயக்க போதிய ஓட்டுநர், நடத்துநர்கள் இல்லாத சூழலில் ஆயிரத்துக்கும் மேற்பட்ட பேருந்துகள் பணிமனைகளில் நிறுத்தப்பட்டன. இதனால் பொதுமக்கள் பெரிதளவில் பாதிக்கப்பட்டனர். இதனை சரி செய்யும் வகையில் பணிமனைக்கு வரும் பேருந்துகளுக்கு டீசல் நிரப்புதல் போன்ற பணியில் இருந்த ஓட்டுநர்களை, வழித்தடத்தில் இயங்கும் பேருந்துகளில் பணியமர்த்த மாநகர போக்குவரத்துக் கழகம் நடவடிக்கை எடுத்தது.