மாடுகளின் சண்டையை விலக்கிய நாய்: சமூக வலைதளங்களில் வீடியோ வைரல்

திருப்புத்தூர்: திருப்புத்தூரில் இரண்டு காளை மாடுகளின் சண்டையை விலக்க நாய் ஒன்று விடாமல் குரைத்த காட்சி சமூக வலைதளங்களில் வைரலாக பரவி வருகிறது. சிவகங்கை மாவட்டம், திருப்புத்தூரில் உள்ள மதுரை சாலையில் பெட்ரோல் பங்க் அருகே நேற்று மேய்ச்சலுக்கு வந்த இரண்டு காளை மாடுகள் திடீரென முட்டிக் கொண்டு சண்டையிட்டன. இதைப் பார்த்த கருப்பு நாய் ஒன்று காளைகளின் சண்டையை விலக்குவது போல, அவைகளுக்கு இடையே புகுந்து விடாமல் குரைத்துக் கொண்டிருந்தது. ஆனால், காளைகள் இரண்டு விடாமல் முட்டி சண்டையிட்டு கொண்டிருந்தன. நாயும் விடாமல் தொடர்ந்து குரைத்ததால், ஒரு கட்டத்தில் அவைகள் சண்டையை விட்டு விலகிச் சென்றன.

இந்தக் காட்சி சமூக வலை தளங்களில் வைரலாக பரவி வருகிறது. நாய் குறித்து விசாரித்தபோது, ‘சண்டையிட்ட இரண்டு மாடுகளில், ஒரு மாடு தனது வீட்டு எஜமான் வளர்க்கும் மாடு என்பதும், தன்னோடு வீட்டில் இருக்கும் பிராணி என்ற காரணத்தினால் தன் விசுவாசத்தை காட்டி நாய் கடுமையாக முயன்று சண்டையை விலக்க போராடியதும் தெரிய வந்தது. விபத்து, கொலை, சண்டை என நம் கண்முன் பல சம்பவங்கள் நாள்தோறும் அரங்கேறினாலும் அதை கண்டு கொள்ளாமல் செல்லும் மனிதர்கள் மத்தியில் நன்றியுள்ள நாயின் போராட்டம் பெரும் நெகிழ்ச்சியை ஏற்படுத்தியுள்ளது.

The post மாடுகளின் சண்டையை விலக்கிய நாய்: சமூக வலைதளங்களில் வீடியோ வைரல் appeared first on Dinakaran.