பள்ளிக்கரணை சதுப்பு நிலத்தை ஆக்கிரமித்து கட்டப்பட்டிருந்த 47 வீடுகள் அதிரடி அகற்றம்: பெண் மயங்கியதால் பரபரப்பு; 7 பேர் கைது

துரைப்பாக்கம்: பள்ளிக்கரணை சதுப்பு நிலத்தை ஆக்கிரமித்து கட்டப்பட்டிருந்த 47 வீடுகள், ஜேசிபி இயந்திரம் மூலம் இன்று அதிரடியாக அகற்றப்பட்டது. அப்போது, 8 பேரை போலீசார் கைது செய்தனர். அவர்களில் பெண் ஒருவர் மயங்கியதால் பரபரப்பு ஏற்பட்டுள்ளது. துரைப்பாக்கம் அடுத்த மேட்டுக்குப்பம், மகாலட்சுமி நகரில் 47 குடும்பங்கள் கடந்த 30 ஆண்டுகளுக்கும் மேலாக வசித்து வருகிறது. இவர்கள் வசிக்கும் பகுதி பள்ளிக்கரணை சதுப்பு நிலத்துக்குட்பட்டதாகும். அதனால், ‘இப்பகுதி பள்ளிக்கரணை சதுப்பு நிலம்’ என கூறி வனத்துறை சார்பில் வீடுகளை காலி செய்யும்படி 47 குடும்பங்களுக்கும் கடந்தாண்டு நோட்டீஸ் வழங்கப்பட்டது. அதற்கு அவர்கள், ‘நாங்கள் 30 வருடங்களாக இங்கு வசிக்கிறோம். வீட்டு வரி, குடிநீர் வரி செலுத்தி வருகிறோம். அரசு சார்பில் குடிநீர் இணைப்பு, மின்சார இணைப்பு உள்ளிட்ட அடிப்படை வசதிகள் எங்களுக்கு செய்து தரப்பட்டுள்ளது.

அதனால் வீடுகளை காலி செய்ய மாட்டோம்’ என போராட்டத்தில் ஈடுபட்டனர். இதையடுத்து வனத்துறை சார்பில் உயர் நீதிமன்றத்தில் வழக்கு தொடரப்பட்டது. வழக்கை விசாரித்த நீதிமன்றம், நீர்நிலைகளை ஆக்கிரமித்திருக்கும் வீடுகளை அகற்ற உத்தரவிட்டது. இதையடுத்து வருவாய் துறையினர், வனத்துறையினர், மாநகராட்சி அதிகாரிகள், தீயணைப்பு துறையினர் மற்றும் துரைப்பாக்கம் போலீசார் இன்று வீடுகளை அகற்ற ஜேசிபி இயந்திரத்துடன் சம்பவ இடத்திற்கு விரைந்தனர். இதற்கு கடும் எதிர்ப்பு தெரிவித்து அப்பகுதியை சேர்ந்த 50க்கும் மேற்பட்டோர், சாலையில் அமர்ந்து போராட்டத்தில் ஈடுபட்டனர். அவர்களிடம் போலீசார் பேச்சுவார்த்தை நடத்தினர்.

வீடுகளை காலி செய்ய மாட்டோம் என தெரிவித்ததால் லட்சுமி (45), பத்மா (50), பன்னீர்செல்வம் (55), ராஜா (25), துரை (23), ராமலிங்கம் (70), செல்வம் (58), ராம் (45) ஆகிய 8 பேரை கைது செய்தனர். அவர்களில் லட்சுமி என்பவர் மயங்கி விழுந்ததால் அவரை மீட்டு 108 ஆம்புலன்ஸ் மூலம் மருத்துவமனைக்கு அழைத்து சென்றனர். பின்னர் 7 பேரை அங்குள்ள திருமண மண்டபத்தில் தங்க வைத்தனர். இதனையடுத்து நீர்நிலையை ஆக்கிரமித்து கட்டப்பட்ட 47 வீடுகள் அகற்றப்பட்டது. இச்சம்பவத்தால் அப்பகுதியில் பெரும் பரபரப்பு ஏற்பட்டது.

The post பள்ளிக்கரணை சதுப்பு நிலத்தை ஆக்கிரமித்து கட்டப்பட்டிருந்த 47 வீடுகள் அதிரடி அகற்றம்: பெண் மயங்கியதால் பரபரப்பு; 7 பேர் கைது appeared first on Dinakaran.