நெல்லை அரசு உதவிபெறும் பள்ளியில் ரஜினி, விஜய் படங்கள் திரையிடல்: கல்வி துறை அதிகாரிகள் விசாரணை

திருநெல்வேலி: நெல்லை மாவட்டம் அம்பாசமுத்திரம் வட்டம் வி.கே.புரத்தில் உள்ள அரசு உதவிபெறும் பெண்கள் பள்ளியில், சுற்றுவட்டாரப் பகுதிகளைச் சேர்ந்த ஏராளமான மாணவிகள் பயில்கின்றனர். இந்நிலையில், கடந்த 9-ம் தேதி 6 முதல் 12-ம் வகுப்பு மாணவிகளுக்காக, நடிகர் விஜய் நடித்த ‘கோட்’ படம் திரையிடப்பட்டது. தொடர்ந்து, 1 முதல் 5-ம் வகுப்பு வரையிலான மாணவிகளுக்காக நடிகர் ரஜினி நடித்த ‘வேட்டையன்’ படம் திரையிடப்பட்டது.

இதற்காக விஜய் படத்துக்கு தலா ரூ.25, ரஜினி படத்துக்கு தலா ரூ.10 வீதம் மாணவிகளிடம் கட்டாயமாக வசூலிக்கப்பட்டதாகத் தெரிகிறது. எனினும், பெற்றோர் தரப்பில் புகார்கள் தெரிவிக்கப்படவில்லை. இந்து முன்னணியினர் பள்ளி நிர்வாகத்துக்கு எதிர்ப்பு தெரிவித்து, சமூக வலைதளங்களில் கருத்துகளைப் பதிவிட்டனர்.