திருவண்ணாமலையில் மண்சரிவில் சிக்கி பலியான 7 பேரின் குடும்பத்தினருக்கு அரசு சார்பில் தலா ₹5 லட்சம் நிவாரணம்

*அமைச்சர் எ.வ.வேலு வழங்கினார்

திருவண்ணாமலை : திருவண்ணாமலை தீபமலைப்பகுதியில் மண் சரிவில் சிக்கி பலியான 7 பேரின் குடும்பத்தினருக்கு தமிழ்நாடு அரசின் சார்பில் தலா ₹5 லட்சம் நிவாரண தொகையை அமைச்சர் எ.வ.வேலு வழங்கினார்.திருவண்ணாமலையில் பெஞ்சல் புயல் காரணமாக பெய்த கனமழையால், தீபம் ஏற்றும் மலையில் கடந்த 1ம் தேதி மண்சரிவு ஏற்பட்டது. மேலும், மண் சரிவினால் பாறைகளும் உருண்டன.

அதனால், திருவண்ணாமலை வஉசி நகர் பகுதியில் மண் சரிவில் சிக்கி வீட்டுக்குள் இருந்த கூலித்தொழிலாளி ராஜ்குமார்(32), அவரது மனைவி மீனா(26), அவர்களது குழந்தைகள் கவுதம்(9), மகள் இனியா(7) மற்றும் உறவினர்களின் குழந்தைகளான மகா (12), ரம்யா(12), வினோதினி(14) ஆகியோர் மண்ணுக்குள் புதைந்து பரிதாபமாக உயிரிழந்தனர்.

அதைத்தொடர்ந்து, தேசிய பேரிடம் மீட்புக் குழுவினர் இரண்டு நாட்களாக மீட்பு பணியில் ஈடுபட்டனர். மேலும், மீட்புப்பணியை துணை முதல்வர் உதயநிதிஸ்டாலின், பொதுப்பணித்துறை அமைச்சர் எ.வ.வேலு, கலெக்டர் பாஸ்கரபாண்டியன் ஆகியோர் நேரில் ஆய்வு செய்தனர். மேலும், 34 மணி நேர முயற்சிக்கு பிறகு, ஏழு பேரின் உடல்களும் சடலமாக மீட்கப்பட்டது.

இந்நிலையில், திருவண்ணாமலை மண்சரிவில் சிக்கி உயிரிழந்த 7 பேரின் குடும்பத்துக்கும் தலா ₹5 லட்சம் நிவாரணம் வழங்கப்படும் என முதல்வர் மு.க.ஸ்டாலின் அறிவித்திருந்தார்.
அதன்படி, திருவண்ணாமலை கலெக்டர் அலுவலகத்தில் நேற்று 7 பேரின குடும்பத்தினருக்கும் தலா ₹5 லட்சம் நிவாரண உதவித்தொகைக்கான ஆணையை பொதுப்பணித்துறை அமைச்சர் எ.வ.வேலு வழங்கினார்.

மேலும், பாதிக்கப்பட்ட குடும்பத்துக்கு அரசின் சார்பில் தேவையான உதவிகள் வழங்க நடவடிக்கை எடுக்கப்படும் என தெரிவித்தார்.அப்போது, துணை சபாநாயகர் கு.பிச்சாண்டி, கலெக்டர் பாஸ்கரபாண்டியன், மாநில தடகளச்சங்க துணைத் தலைவர் எ.வ.வே.கம்பன், மாநகராட்சி மேயர் நிர்மலாவேல்மாறன், தலைமை செயற்குழு உறுப்பினர் இரா.தரன், நகர செயலாளர் கார்த்தி வேல்மாறன், மாவட்ட பொருளாளர் எஸ்.பன்னீர்செல்வம், மாவட்ட துணை செயலாளர் பிரியாவிஜயரங்கன், துரை வெங்கட் உள்ளிட்ட பலர் உடன் இருந்தனர்.

The post திருவண்ணாமலையில் மண்சரிவில் சிக்கி பலியான 7 பேரின் குடும்பத்தினருக்கு அரசு சார்பில் தலா ₹5 லட்சம் நிவாரணம் appeared first on Dinakaran.