திருப்போரூர் அருகே சோகம்; பைக் மீது கார் மோதியதில் உடல் நசுங்கி ஒரே குடும்பத்தை சேர்ந்த 3 பேர் பலி: இளைய மகன் படுகாயம்

திருப்போரூர்: திருப்போரூர் அருகே நேற்றிரவு பைக் மீது கார் மோதியதில் உடல் நசுங்கி ஒரே குடும்பத்தை சேர்ந்த 3 பேர் பலியான சம்பவம் சோகத்தை ஏற்படுத்தியுள்ளது. இவர்களது இளைய மகன் மருத்துவமனையில் சிகிச்சை பெற்று வருகிறார். காரில் வந்த 3 பேர் லேசான காயத்துடன் தனியார் மருத்துவமனையில் சிகிச்சை பெற்று வருகின்றனர். கேளம்பாக்கம் அடுத்த தையூர் பாலமாநகர் பகுதியை சேர்ந்தவர் ஹரிதாஸ் (34). தனியார் நிறுவன ஊழியர். இவரது மனைவி சுகந்தி (33). இவர்களது மகன்கள் லியோ டேனியல் (10), ஜோ டேனியல் (5). நேற்று மாலை ஹரிதாஸ், தனது மனைவி, மகன்களை ஒரே பைக்கில் ஏற்றிக்கொண்டு திருப்போரூர் அடுத்த காயார் கிராமத்தில் வசிக்கும் தனது மாமியார் வீட்டு நிகழ்ச்சியில் பங்கேற்றுள்ளார்.

பின்னர், நிகழ்ச்சி முடிந்ததும் குடும்பத்துடன் நேற்றிரவு 11 மணி அளவில் ஒரே பைக்கில் 4 பேரும் வீட்டுக்கு புறப்பட்டனர். தையூர் பகுதியில் தனியார் பள்ளி அருகே வந்தபோது, எதிரே வேகமாக வந்த கார், பைக் மீது மோதியது. இதில், பைக்கில் வந்த 4 பேரும் தூக்கி வீசப்பட்டனர். ஹரிதாஸ் மற்றும் மூத்த மகன் லியோ டேனியல் ஆகியோர் படுகாயமடைந்து ரத்த வெள்ளத்தில் சம்பவ இடத்திலேயே உயிரிழந்தனர். படுகாயமடைந்து உயிருக்கு போராடிய சுகந்தி, இளைய மகன் ஜோ டேனியல் ஆகியோரை அக்கம்பக்கத்தினர் மீட்டு கேளம்பாக்கத்தில் உள்ள தனியார் மருத்துவமனைக்கு கொண்டு சென்றனர். ஆனால் வழியிலேயே சுகந்தி உயிரிழந்தார். ஜோ டேனியலுக்கு மருத்துவமனையில் தீவிர சிகிச்சை அளிக்கப்பட்டு வருகிறது.

தகவல் அறிந்து சம்பவ இடத்துக்கு விரைந்து வந்த காயார் போலீசார் விசாரித்தபோது, காரை ஓட்டி வந்தவர் காயார் கிராமத்தை சேர்ந்த அஸ்வின் குமார் (43) என்பதும், காரில் மனைவி பிந்து (35), அவர்களது மகன் அபினேஷ் பால்மோனி (6) ஆகியோர் இருந்ததும், கேளம்பாக்கத்தில் செருப்பு கடை நடத்தி வருவதும் தெரியவந்துள்ளது. கடை வியாபாரத்தை முடித்துவிட்டு நேற்று இரவு வீட்டிற்கு திரும்பியபோது இந்த விபத்து நடந்துள்ளது. விபத்தில் காரை ஓட்டி வந்த அஸ்வின் குமார், அவரது மனைவி, மகனுக்கும் லேசான காயம் ஏற்பட்டுள்ளதால் 3 பேரும் கேளம்பாக்கத்தில் உள்ள தனியார் மருத்துவமனையில் அனுமதிக்கப்பட்டுள்ளனர். விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர். பைக் மீது கார் மோதி ஒரே குடும்பத்தை சேர்ந்த 3 பேர் பலியான சம்பவம் திருப்போரூர் அருகே சோகத்தை ஏற்படுத்தியுள்ளது.

The post திருப்போரூர் அருகே சோகம்; பைக் மீது கார் மோதியதில் உடல் நசுங்கி ஒரே குடும்பத்தை சேர்ந்த 3 பேர் பலி: இளைய மகன் படுகாயம் appeared first on Dinakaran.