“தமிழக மக்களிடம் ‘தேசியம்’ கொள்கை...” - 'டங்ஸ்டன் ரத்து’க்கான பாராட்டு விழாவில் கிஷன் ரெட்டி பேச்சு

மதுரை: “பிரதமர் மோடி அரசியலுக்காக இல்லாமல், உண்மையில் தமிழ் மக்கள், தமிழ் பண்பாடு மற்றும் கலச்சாரத்தின் மீது அன்பு கொண்டுள்ளார். தேசியம் வளர்ந்து வருவதால் தமிழக மக்கள் பிரதமர் மோடியை ஆதரிப்பார்கள் என்ற நம்பிக்கை உள்ளது” என அ.வள்ளாலப்பட்டியில் மக்கள் நடத்தி பாராட்டு விழாவில் மத்திய அமைச்சர் கிஷன் ரெட்டி பேசினார்.

மேலூர் டங்ஸ்டன் சுரங்க திட்டம் ரத்து செய்யப்பட்டதற்காக அ.வள்ளாலப்பட்டியில் மத்திய அமைச்சர் கிஷன் ரெட்டி, தமிழக பாஜக தலைவர் அண்ணாமலை ஆகியோருக்கு பொதுமக்கள் சார்பில் இன்று (ஜன.30) பாராட்டு விழா நடத்தப்பட்டது. மகாமுனி அம்பலக்காரர் தலைமை வகித்தார். சேதுராமன் அம்பலக்காரர் வரவேற்றார். இதில் மத்திய அமைச்சர் கிஷன்ரெட்டி பேசியது: “பிரதமர் மோடி தலைமையிலான அரசு, நாட்டின் வளர்ச்சிக்கும், ஏழை, எளிய மக்களின் நலனுக்குமான அரசு. தமிழ் கலச்சாரம் உட்பட நாட்டின் கலாச்சாரம், பாரம்பரியத்தை மோடி அரசு பாதுகாத்து வருகிறது. பிரதமர் மோடி மீது அளவு கடந்து அன்பு செலுத்தும் தமிழக மக்களுக்கு நன்றி தெரிவித்துக் கொள்கிறேன்.