"தக் லைப்" ஓடிடி ரிலீஸ் : கமலின் அறிவிப்புக்கு நன்றி தெரிவித்த திரையரங்கு உரிமையாளர்கள் சங்கம்

சென்னை,

36 வருடங்களுக்குப் பிறகு கமல்ஹாசன் - மணிரத்னம் கூட்டணியில் 'தக் லைப்' படம் உருவாகியுள்ளது. இதில் சிம்பு, திரிஷா, ஜோஜு ஜார்ஜ், ஐஸ்வர்யா லட்சுமி, கவுதம் கார்த்திக், பாலிவுட் நடிகர் அலி பசல் உள்ளிட்டோர் முக்கிய காதாபாத்திரங்களில் நடித்துள்ளனர்.

இசைப்புயல் ஏ.ஆர்.ரகுமான் இசையமைத்திருக்கும் இப்படம் வருகிற ஜூன் 5-ம் தேதி திரைக்கு வருகிறது. இப்படத்தின் ஓடிடி உரிமையை நெட்பிளிக்ஸ் நிறுவனம் கைப்பற்றி இருக்கிறது.

'தக் லைப்' படக்குழு தற்போது மும்பையில் புரமோசன் பணியில் ஈடுபட்டுள்ளது. அப்போது பேசிய கமல்ஹாசன் , தக் லைப் படத்தின் ஓடிடி ரிலீஸ் குறித்து முக்கிய அப்டேட் கொடுத்தார்.அதன்படி, 'தக் லைப்' திரைப்படத்தின் திரையரங்க வெளியீட்டிற்கு 8 வாரத்திற்குப் பிறகே ஓடிடியில் வெளியாகும் என கமல்ஹாசன் கூறினார். மேலும், இந்த முடிவை எந்த தயக்கமும் இல்லாமல் நெட்பிளிக்ஸ் ஏற்றுக்கொண்டதாகவும், இதுதான் திரைத்துறைக்கு ஆரோக்கியமான போக்கு எனவும் அவர் கூறினார்.

இந்நிலையில் 'தக் லைப்' பட ஓடிடி வெளியீடு 8 வாரங்களுக்கு பிறகு அறிவிக்கப்படும் என்ற முன்னெடுப்புக்காக நடிகர் கமலஹாசனுக்கு தமிழ்நாடு திரையரங்கு உரிமையாளர்கள் சங்கம் நன்றி தெரிவித்துள்ளது. இந்த முடிவை அனைத்து தயாரிப்பாளர்களும் அனைத்து படங்களுக்கும் இதனை அமல்படுத்த வேண்டும் என்றும் கோரிக்கை வைத்துள்ளனர்.