டென்னிஸ் தரவரிசை முதல் இடத்தில் சபலென்கா, சின்னர்

லண்டன்: மாட்ரிட் ஓபன் டென்னிசுக்கு பிறகு டென்னிஸ் உலக தரவரிசையில் பெரிய மாற்றமில்லை. பெண்களுக்கான டபிள்யூடிஏ தர வரிசையில் மாட்ரிட் சாம்பியன் அரினா சபலென்கா (பெலராஸ்), இகா ஸ்வியடெக்(போலந்து) ஆகியோர் தொடர்ந்து முதல் 2 இடங்களில் நீடிக்கின்றனர். மாட்ரிட் ஒபனில் பைனல் வரை முன்னேறிய கோகோ காஃப் (அமெரிக்கா) ஒரு இடம் முன்னேறி மீண்டும் 3வது இடத்தை பிடித்துள்ளார். மற்றொரு அமெரிக்க வீராங்கனை ஜெசிகா பெகுலா ஒரு இடம் பின்தங்கி 4வது இடத்துக்கு இறங்கியுள்ளார்.

ஆண்களுக்கான ஏடிபி உலக தரவரிசையில், சமீப காலத்தில் ஆடாத ஜானிக் சின்னர் (இத்தாலி) தொடர்ந்து முதல் இடத்தில் உள்ளார். அலெக்சாண்டர் ஸ்வெரவ் (ஜெர்மன்), கார்லோஸ் அல்கராஸ் (ஸ்பெயின்), டெய்லர் ஃபிரிட்ஸ் (அமெரிக்கா) ஆகியோர் அடுத்த 3 இடங்களை பிடித்துள்ளனர். பிரிட்டன் வீரர் ஜேக் டிரேபர் ஒரு இடம் முன்னேறி 5வது இடத்தை பிடிக்க, அந்த இடத்தில் இருந்த நட்சத்திர வீரர் செர்பியாவின் நோவக் ஜோகோவிச் ஒரு இடம் பின்தங்கி 6 இடத்துக்கு நகர்ந்துள்ளார். மாட்ரிட் சாம்பியன் பட்டம் வென்ற கேஸ்பர் ரூட் (நார்வே) அதிபட்சமாக 8 இடங்கள் முன்னேறி 7வது இடத்திற்கு முன்னேறி இருக்கிறார்.

The post டென்னிஸ் தரவரிசை முதல் இடத்தில் சபலென்கா, சின்னர் appeared first on Dinakaran.