ஜப்பான் பார்முலா1 கார்பந்தயம்: நெதர்லாந்து வீரர் வெர்ஸ்டப்பென் முதலிடம்

சுஜூகா,

இந்த ஆண்டுக்கான பார்முலா1 கார்பந்தயம் உலகம் முழுவதும் 24 சுற்றுகளாக நடத்தப்படுகிறது. இதன் 3-வது சுற்றான ஜப்பான் கிராண்ட்பிரி அங்குள்ள சுஜூகா ஓடுதளத்தில் நேற்று நடந்தது. பந்தய தூரம் 307.471 கிலோமீட்டர். வழக்கம் போல் 10 அணிகளைச் சேர்ந்த 20 வீரர்கள் இலக்கை நோக்கி ஜெட் வேகத்தில் சீறிப்பாய்ந்தனர்.

இதில் முதல் வரிசையில் இருந்து புறப்பட்ட 4 முறை சாம்பியனும், ரெட்புல் அணி வீரருமான மேக்ஸ் வெர்ஸ்டப்பென் (நெதர்லாந்து) 1 மணி 22 நிமிடம் 06.983 வினாடிகளில் இலக்கை கடந்து முதலிடம் பிடித்து அதற்குரிய 25 புள்ளிகளை தட்டிச் சென்றார். இந்த சீசனில் அவர் பெற்ற முதல் வெற்றி இதுவாகும். அத்துடன் ஜப்பான் கிராண்ட்பிரியில் தொடர்ந்து 4-வது ஆண்டாக ஆதிக்கத்தை நிலை நாட்டியிருக்கிறார்.

அவரை விட 1.423 வினாடி மட்டுமே பின்தங்கிய இங்கிலாந்து வீரர் லான்டோ நோரிஸ் (மெக்லரன் அணி) 2-வதாக வந்து 18 புள்ளிகளை பெற்றார். ஆஸ்திரேலியாவின் ஆஸ்கர் பியாஸ்ட்ரி 3-வது இடத்தை பிடித்தார். 7 முறை சாம்பியனான இங்கிலாந்து வீரர் லீவிஸ் ஹாமில்டன் (பெராரி அணி) 7-வது இடத்துக்கு தள்ளப்பட்டார்.

இதுவரை நடந்துள்ள 3 சுற்றுகள் முடிவில் லான்டோ நோரிஸ் 62 புள்ளிகளுடன் முதலிடத்திலும், வெர்ஸ்டப்பென் 61 புள்ளிகளுடன் 2-வது இடத்திலும் உள்ளனர். இதன் 4-வது சுற்று போட்டி பக்ரைனில் வருகிற 13-ந்தேதி நடக்கிறது.