சர்வதேச டி20 கிரிக்கெட்; பாபர் அசாமின் சாதனையை முறியடித்த ஹசன் நவாஸ்

ஆக்லாந்து,

பாகிஸ்தான் கிரிக்கெட் அணி நியூசிலாந்தில் சுற்றுப்பயணம் மேற்கொண்டு 5 போட்டிகள் கொண்ட டி20 தொடரில் ஆடி வருகிறது. இதில் முதல் இரு ஆட்டங்களில் நியூசிலாந்து வெற்றி பெற்று தொடரில் 2-0 என முன்னிலையில் இருந்தது. இந்நிலையில், இரு அணிகளுக்கும் இடையிலான 3வது டி20 போட்டி ஆக்லாந்தில் இன்று நடைபெற்றது. இதில் டாஸ் வென்ற பாகிஸ்தான் முதலில் பந்துவீசுவதாக அறிவித்தது.

தொடர்ந்து பேட்டிங் செய்த நியூசிலாந்து 19.5 ஓவர்களில் அனைத்து விக்கெட்டையும் இழந்து 204 ரன்கள் குவித்தது. நியூசிலாந்து தரப்பில் அதிரடியாக ஆடிய மார்க் சாப்மேன் 94 ரன்கள் (44 பந்துகள்) எடுத்தார். இதனையடுத்து 205 ரன்கள் அடித்தால் வெற்றி என்ற இமாலய இலக்கை நோக்கி களம் கண்ட பாகிஸ்தான் வெறும் 16 ஓவர்களில் 1 விக்கெட்டை மட்டும் இழந்து 207 ரன்கள் எடுத்து 9 விக்கெட் வித்தியாசத்தில் அபார வெற்றி பெற்றது.

பாகிஸ்தான் தரப்பில் ஹசன் நவாஸ் 105 ரன்னும் (45 பந்துகள்), சல்மான் ஆகா 51 ரன்னும் (31 பந்துகள்) எடுத்தனர். இதன் மூலம் 5 போட்டிகள் கொண்ட டி20 தொடரில் 3 போட்டிகள் நிறைவடைந்துள்ள நிலையில் 2-1 என்ற கணக்கில் நியூசிலாந்து முன்னிலையில் உள்ளது. இரு அணிகளுக்கும் இடையிலான 4வது டி20 போட்டி வரும் 23ம் தேதி நடைபெறுகிறது.

இந்நிலையில், இன்றைய ஆட்டத்தில் ஹசன் நவாஸ் சதம் அடித்ததன் மூலம் சர்வதேச டி20 கிரிக்கெட்டில் பாபர் அசாமின் மாபெரும் சாதனை ஒன்றை முறியடித்துள்ளார். அதாவது, சர்வதேச டி20 கிரிக்கெட்டில் பாகிஸ்தான் அணிக்காக குறைந்த பந்தில் சதம் அடித்த வீரர் என்ற பாபர் அசாமின் (49 பந்து) சாதனையை ஹசன் நவாஸ் (44 பந்து) முறியடித்துள்ளார்.

சர்வதேச டி20 கிரிக்கெட்டில் பாகிஸ்தான் அணிக்காக குறைந்த பந்தில் சதம் அடித்த வீரர்கள்:

ஹசன் நவாஸ் - 44 பந்து (எதிரணி நியூசிலாந்து, 2024)

பாபர் அசாம் - 49 பந்து (எதிரணி தென் ஆப்பிரிக்கா, 2021)

அகமது சேஷாத் - 58 பந்து (எதிரணி வங்காளதேசம், 2014)

பாபர் அசாம் - 58 பந்து (எதிரணி நியூசிலாந்து, 2023)