சர்வதேச ஒருநாள் கிரிக்கெட்டில் 14,000 ரன்களை கடந்த விராட் கோலி

துபாய்,

8 அணிகள் கலந்து கொண்டுள்ள சாம்பியன்ஸ் டிராபி கிரிக்கெட் தொடர் பாகிஸ்தான் மற்றும் துபாயில் நடைபெற்று வருகிறது. இந்த தொடரில் துபாயில் இன்று நடைபெற்று வரும் லீக் ஆட்டத்தில் இந்தியா - பாகிஸ்தான் அணிகள் ஆடி வருகின்றன.

இந்த ஆட்டத்திற்கான டாசில் வென்ற பாகிஸ்தான் அணி முதலில் பேட்டிங் செய்வதாக அறிவித்தது. இதையடுத்து முதலில் பேட்டிங் ஆடிய பாகிஸ்தான் அணி இந்தியாவின் பந்துவீச்சை தாக்குப்பிடிக்க முடியாமல் அடுத்தடுத்து விக்கெட்டுகளை இழந்தது. இதன் காரணமாக பாகிஸ்தான் அணி 49.4 ஓவர்களில் அனைத்து விக்கெட்டையும் இழந்து 241 ரன்கள் மட்டுமே எடுத்தது. பாகிஸ்தான் தரப்பில் அதிகபட்சமாக சவுத் ஷகீல் 62 ரன்கள் எடுத்தார்.

இந்தியா தரப்பில் குல்தீப் யாதவ் 3 விக்கெட்டும், ஹர்திக் பாண்ட்யா 2 விக்கெட்டும் வீழ்த்தினர். இதையடுத்து 242 ரன் எடுத்தால் வெற்றி என்ற இலக்குடன் இந்தியா ஆடி வருகிறது. இந்த ஆட்டத்தில் கேப்டன் ரோகித் சர்மா 20 ரன்னில் அவுட் ஆனார். இதையடுத்து சுப்மன் கில் மற்றும் விராட் கோலி இருவரும் நிதானமாக ஆடி ரன்கள் சேர்த்து வருகின்றனர்.

இந்நிலையில், இந்த ஆட்டத்தில் விராட் கோலி 15 ரன்கள் எடுத்திருந்த போது சர்வதேச ஒருநாள் கிரிக்கெட்டில் 14,000 ரன்களை கடந்தார். சர்வதேச ஒருநாள் கிரிக்கெட்டில் இந்த சாதனையை விராட் கோலி 3வது வீரராக படைத்துள்ளார். இதற்கு முன்னர் சச்சின் தனது 350-வது இன்னிங்சில் 14,000 ரன்களையும், சங்கக்கார 378-வது இன்னிங்சில் 14,000 ரன்களையும் கடந்திருந்தனர். தற்போது விராட் கோலி 287*வது இன்னிங்சில் இந்த சாதனையை படைத்துள்ளார்.