கோவையில் இரும்பு பால பணிகள்: 7 ரெயில்கள் மாற்றுப்பாதையில் இயக்கம்

சென்னை,

கோவை பீளமேடு, ஹோப் கல்லூரி பகுதியில் ரெயில்வே மேம்பாலம் பகுதியில் இரும்பு பாலம் அமைக்கும் பணி இன்று முதல் நடைபெற்று வருகிறது. இதையொட்டி கோவை ரெயில்கள் போத்தனூர்-இருகூர் வழியாக இயக்கப்படும் என தெரிவிக்கப்பட்டுள்ளது.

நாளை முதல் 13-ந் தேதி வரை திருவனந்தபுரம்-மைசூரு தினசரி விரைவு ரெயில் (எண்: 16316), கன்னியாகுமரி-திப்ரூகர் விரைவு ரெயில் (எண்: 22503), போத்தனூர் - இருகூர் வழியாக இயக்கப்படும். இதனால், இந்த ரெயில்கள் கோவை ரெயில் நிலையம் செல்வது தவிர்க்கப்படும். போத்தனூர் கூடுதல் நிறுத்தமாக செயல்படும்.

12-ந்தேதி கன்னியாகுமரி-ஸ்ரீ மாதா வைஷ்னவ் தேவி கட்ரா வாராந்திர விரைவு ரெயில் (எண்:16317), 13-ந்தேதி எர்ணாகுளம்-பாட்னா வாராந்திர விரைவு ரெயில் (எண்:22669) போத்தனூர்-இருகூர் வழியாக இயக்கப்படும். இதனால், இந்த ரெயில்கள் கோவை நிலையம் செல்லாது. நாளை முதல் 13-ந் தேதி வரை காரைக்கால்-எர்ணாகுளம் தினசரி விரைவு ரெயில் (எண்:16187), சென்னை சென்ட்ரல்-மேட்டுப்பாளையம் நீலகிரி தினசரி விரைவு ரெயில், இருகூர்-போத்தனூர் வழித்தடத்தில் இயக்கப்படும்.

இதேபோல் 11-ந் தேதி, விசாகப்பட்டினம்-கொல்லம் வாராந்திர விரைவு ரெயில் (எண்: 18567) இருகூர்-போத்தனூர் வழித்தடத்தில் இயக்கப்படும். இதனால், இந்த ரெயில்களானது கோவை ரெயில்நிலையம் செல்வது தவிர்க்கப்படும் என்று தெரிவிக்கப்பட்டுள்ளது.