கோடை கால மின் தேவைக்காக 2000 மெகாவாட் மின்சாரம் வாங்க ஒப்பந்தம்: மின் வாரிய அதிகாரிகள் தகவல்

சென்னை: கோடைகால மின் தேவைக்காக 2000 மெகாவாட் மின்சாரம் வாங்க ஒப்பந்தம் செய்யப்பட்டுள்ளதாக மின் வாரிய அதிகாரிகள் தெரிவித்தனர். தமிழ்நாட்டில் தொழில் வளர்ச்சி மற்றும் வணிகம் பெருகி வருவதால் ஆண்டுதோறும் மின்சார பயன்பாடு அதிகரித்து வருகிறது. தமிழ்நாட்டின் மின் தேவை சராசரியாக 15,000 முதல் 16,000 மெகா வாட்டாக உள்ளது. இந்நிலையில் கோடைக்காலத்தில் மாநிலத்தின் மின்சார பயன்பாடு அதிகரிக்கும், குறிப்பாக வீடு, அலுவலகங்களில், குளிர்சாதன பயன்பாடு அதிகம் இருக்கும் என்பதால், அந்த காலத்தில் மின் தேவை உச்ச அளவை எட்டுகிறது.

கடந்த ஆண்டு மே 2ம் தேதி எப்போதும் இல்லாத வகையில் தமிழ்நாட்டின் மின் தேவை 20,830 மெகாவாட்டாக அதிகரித்தது. தமிழக மின் வாரியத்திற்கு சொந்தமான மின் உற்பத்தி நிலையங்களில் முலம் உற்பத்தியாகும் மின்சாரம் தவிர்த்து குறுகிய கால ஒப்பந்தம், மாநிலங்களுக்கு இடையேயான மின் பரிமாற்ற ஒப்பந்தம் ஆகியவை மூலம் கூடுதல் தேவை பூர்த்தி செய்யப்படும். இந்நிலையில் வரும் கோடை காலாத்தில் அதிகரிக்கும் மின் தேவை பூர்த்தி செய்ய மாதத்திற்கு கூடுதலாக 2000 மெகாவாட் வாங்குவதற்கான ஒப்பந்தம் மேற்கொள்ளப்பட்டுள்ளது.

இது குறித்து மின்வாரிய அதிகாரிகள் கூறியதாவது: இந்த கோடை காலத்தில் தமிழ்நாட்டின் மின்சாரத் தேவை 22,000 மெகாவாட்டுக்கு மேல் உயரும் என்று எதிர்பார்க்கிறது, மேலும் பிப்ரவரி 15 முதல் ஒரு மாதத்திற்கு 2,000 மெகாவாட் மின்சாரம் வாங்குவதற்கான ஒப்பந்தத்தில் கையெழுத்திடப்பட்டுள்ளது. 2,000 மெகாவாட்டுகளில், சுமார் 700 மெகாவாட் 24 மணிநேரமும் பயன்படுத்தப்படும், மீதமுள்ள 1,300 மெகாவாட் மாலை நேர உச்ச மின் தேவையை பூர்த்தி செய்ய பயன்படுத்தப்படும்.

இருப்பினும், மார்ச், ஏப்ரல் மற்றும் மே 15 வரை உச்ச மின் தேவையை பூர்த்தி செய்ய 1,000 மெகாவாட் கூடுதலாக தேவைப்படும்.  நடுத்தர காலத்திற்கு மட்டுமே இந்த மின்சார கொள்முதல் இருக்கும். இதுவரை, 2024ம் ஆண்டு மே 2 ஆம் தேதி 20,830 மெகாவாட் மின் தேவை பதிவாகியுள்ளது, அதே நேரத்தில் அதிகபட்ச தினசரி நுகர்வு கடந்த ஆண்டு ஏப்ரல் 30ம் தேதி 454.320 மில்லியன் யூனிட்களாக இருந்த நிலையில், இந்த ஆண்டு மார்ச் மாதத்தில் உச்ச மின் தேவை இந்த எண்கள் தாண்டும் என எதிர்பார்க்கிறோம். இவ்வாறு அவர்கள் கூறினர்.

The post கோடை கால மின் தேவைக்காக 2000 மெகாவாட் மின்சாரம் வாங்க ஒப்பந்தம்: மின் வாரிய அதிகாரிகள் தகவல் appeared first on Dinakaran.