காஸ் கசிந்து தீ விபத்து: விசைப்படகு எரிந்து சேதம்

கொள்ளிடம்: மீனவர்கள் உணவு சமைத்துக் கொண்டிருந்தபோது, காஸ் கசிந்து தீப்பிடித்ததால் விசைப்படகு எரிந்து நாசமானது. மயிலாடுதுறை மாவட்டம் கொள்ளிடம் அடுத்த பழையாறு சுனாமி நகரை சேர்ந்தவர் கோவிந்தன்(50). இவருக்கு சொந்தமான விசைப்படகு, பழையாறு மீன்பிடி துறைமுகத்தில் நேற்றிரவு நிறுத்தி வைக்கப்பட்டிருந்தது. அந்த விசைப்படகில் வைத்திருந்த காஸ் சிலிண்டரை பயன்படுத்தி மீனவர்கள் உணவு சமைத்து கொண்டிருந்தனர். அப்போது எதிர்பாராதவிதமாக சிலிண்டரில் இருந்து காஸ் வெளியேறி தீப்பிடித்தது. இந்த தீ பரவி விசைப்படகு எரிந்தது.

இந்த தகவல் அறிந்ததுதும் சீர்காழி தீயணைப்பு வீரர்கள் சம்பவ இடத்துக்கு வந்து மீனவர்களுடன் சேர்ந்து தீயை அணைத்தனர். அப்போது மீனவர் கலியபெருமாளின்(55) இரு கால்களிலும் தீக்காயம் ஏற்பட்டது. இதையடுத்து அவரை சிகிச்சைக்காக சீர்காழி அரசு மருத்துவமனையில் சேர்த்தனர். இந்த தீவிபத்தில் ரூ.30 லட்சம் மதிப்பிலான விசைப்படகு எரிந்து சேதமடைந்தது. இதுகுறித்து போலீசார் வழக்குப்பதிந்து விசாரணை நடத்தி வருகின்றனர்.

The post காஸ் கசிந்து தீ விபத்து: விசைப்படகு எரிந்து சேதம் appeared first on Dinakaran.