கார்த்தியின் 'வா வாத்தியார்' பட ரிலீஸில் தாமதம்

சென்னை,

தமிழ் சினிமாவின் முன்னணி நடிகர்களில் ஒருவர் கார்த்தி. இவரது நடிப்பில் சமீபத்தில் வெளியான படம் 'மெய்யழகன்'. இயக்குனர் பிரேம் குமார் இயக்கிய இப்படம் நல்ல வரவேற்பை பெற்றது. அதனைத்தொடர்ந்து, பி.எஸ். மித்ரன் இயக்கத்தில் சர்தார் 2 திரைப்படத்தில் கார்த்தி நடித்து வருகிறார்.

அதுமட்டுமில்லாமல், நலன் குமாரசாமி இயக்கத்தில் 'வா வாத்தியார்' படத்திலும் நடித்து வருகிறார். இப்படத்தில் கார்த்திக்கு ஜோடியாக கீர்த்தி ஷெட்டி நடிக்கிறார். ஸ்டூடியோ கிரீன் நிறுவனம் தயாரிக்க சந்தோஷ் நாராயணன் இப்படத்திற்கு இசையமைக்கிறார். சத்யராஜ், ராஜ் கிரண் உள்ளிட்டோர் இப்படத்தில் முக்கிய கதாபாத்திரங்களில் நடிக்கின்றனர். சமீபத்தில், இப்படத்தின் முதல் பாடலான 'உயிர் பத்திக்காம' பாடல் வெளியாகி வைரலானது.

இந்த நிலையில், வா வாத்தியார் படத்தின் ரிலீஸ் குறித்த தகவல் கிடைத்துள்ளது. அதாவது, இந்தபடத்திற்கான படப்பிடிப்பு பணிகள் இன்னும் 20 நாட்கள் நடத்த வேண்டியுள்ளது. ஆனால் நடிகர் கார்த்தி 'சர்தார் 2' படத்தின் படப்பிடிப்பில் தீவிரம் காட்டி வருகிறார். இதனால் 'வா வாத்தியார்' படப்பிடிப்பு பணியில் தாமதம் ஏற்படுகிறது. எனவே படத்தின் ரிலீஸும் தள்ளிப்போக வாய்ப்புள்ளது. இதற்கிடையில் 'சர்தார் 2' படத்தின் படப்பிடிப்பு முடித்த பின்னரே கார்த்தி 'வா வாத்தியார்' படத்தில் இணைவார் என்ற தகவல் கிடைத்துள்ளது.