ஐபிஎல்: மும்பையை வீழ்த்தி குஜராத் திரில் வெற்றி

மும்பை,

நடப்பு ஐ.பி.எல். கிரிக்கெட் தொடர் நாட்டின் பல்வேறு நகரங்களில் நடைபெற்று வருகிறது. இதில் நேற்று நடந்த 56வது லீக் ஆட்டத்தில் மும்பை இந்தியன்ஸ், குஜராத் டைட்டன்ஸ் அணிகள் மோதின. மும்பை வான்கடே மைதானத்தில் நடந்த இந்த ஆட்டத்தில் முதலில் பேட்டிங் செய்த மும்பை 20 ஓவர்கள் முடிவில் 155 ரன்கள் எடுத்தது. அந்த அணியில் அதிகபட்சமாக வில் ஜாக்ஸ் 53 ரன்கள் சேர்த்தார்.

இதையடுத்து 156 ரன்கள் எடுத்தால் வெற்றி என்ற இலக்குடன் குஜராத் களமிறங்கியது. ஆட்டம் நடைபெற்றுக்கொண்டிருந்தபோது திடீரென மழை குறுக்கிட்டது. அப்போது குஜராத் 14 ஓவர்கள் முடிவில் 2 விக்கெட்டுகள் இழப்பிற்கு 107 ரன்கள் எடுத்திருந்தது. இதையடுத்து மழை நின்ற உடன் டக் ஒர்த் லூயிஸ் முறைப்படி 19 ஓவரில் 147 ரன்கள் எடுத்தால் வெற்றி என்று இலக்கு நிர்ணயிக்கப்பட்டது. வெற்றிபெற கடைசி ஓவரில் 15 ரன்கள் தேவைப்பட்டது. இறுதியில் 19வது ஓவரில் 7 விக்கெட்டுகளை இழந்த குஜராத் 147 ரன்கள் சேர்த்தது. இதன் மூலம் டக் ஒர்த் லூயிஸ் முறைப்படி மும்பையை 3 விக்கெட்டுகள் வித்தியாசத்தில் வீழ்த்தில் குஜராத் டைட்டன்ஸ் திரில் வெற்றிபெற்றது. இந்த வெற்றி மூலம் புள்ளி பட்டியலில் குஜராத் டைட்டன்ஸ் முதல் இடம் பிடித்துள்ளது.