எஸ்.எஸ்.எல்.சி. பொதுத் தேர்வு விடைத்தாள் திருத்தும் பணி இன்று தொடக்கம்

சென்னை,

தமிழ்நாட்டில் கடந்த மாதம் (மார்ச்) 28-ந் தேதி எஸ்.எஸ்.எல்.சி. பொதுத் தேர்வு தொடங்கியது. முன்னதாக, பிப்ரவரி 22-ந் தேதி முதல் 28-ந் தேதிக்குள் குறிப்பிட்ட நாளில் செய்முறை தேர்வு நடைபெற்றது. இந்தத் தேர்வை 4 லட்சத்து 46 ஆயிரத்து 411 மாணவர்கள், 4 லட்சத்து 40 ஆயிரத்து 465 மாணவிகள், 25 ஆயிரத்து 888 தனித் தேர்வர்கள், 272 சிறைவாசிகள் என மொத்தம் 9 லட்சத்து 13 ஆயிரத்து 36 பேர் எழுதினார்கள். 12 ஆயிரத்து 480 பள்ளிகளை சேர்ந்த மாணவ - மாணவிகள் 4,113 தேர்வு மையங்களில் இந்தத் தேர்வை எழுதினார்கள்.

தேர்வு தொடங்கிய முதல் நாளான மார்ச் 28-ந் தேதி தமிழ், ஏப்ரல் 2-ந் தேதி ஆங்கிலம், 4-ந் தேதி விருப்ப மொழி, 7-ந் தேதி கணிதம், 11-ந் தேதி அறிவியல் என குறிப்பிட்ட இடைவெளியில் தேர்வுகள் நடைபெற்றன. இந்த நிலையில், கடைசி தேர்வான சமூக அறிவியல் கடந்த 15 ஆம் தேதி (செவ்வாய்கிழமை) நடந்து முடிந்தது. அனைத்து தேர்வுகளும் முடிவடைந்த நிலையில், எஸ்.எஸ்.எல்.சி. விடைத்தாள் திருத்தும் பணி தமிழக முழுவதும் இன்று தொடங்கப்பட இருக்கிறது.

தினமும் காலை 9 மணி முதல் மாலை ஐந்து முப்பது மணி வரை இந்த பணி நடைபெறுகிறது. வரும் 30ஆம் தேதியுடன் விடைத்தாள் திருத்தும் பணி நிறைவடைகிறது. தேர்வு முடிவுகள் அடுத்த மாதம் 19-ந் தேதி வெளியிடப்படும் என்று ஏற்கனவே அறிவிக்கப்பட்டுள்ளது.