உயர்கல்வித் துறை சார்பில் ரூ.120.02 கோடியில் கட்டப்பட்டுள்ள கல்விசார் கட்டிடங்கள் திறப்பு

சென்னை: உயர்கல்வித் துறை சார்பில் ரூ.120.02 கோடி செலவில் கட்டப்பட்டுள்ள கல்விசார் கட்டிடங்களை முதல்வர் மு.க.ஸ்டாலின் திறந்து வைத்தார். இத்துடன் ரூ.207 கோடியே 82 லட்சத்து 47 ஆயிரம் செலவில் புதிதாக கட்டப்படவுள்ள உயர்கல்வித் துறை கட்டிடங்களுக்கும் முதல்வர் அடிக்கல் நாட்டினார். சென்னை ராணி மேரி கல்லூரியில் நேற்று நடைபெற்ற நிகழ்ச்சியில், உயர்கல்வித் துறை சார்பில், ராணி மேரி கல்லூரியில் ரூ.42 கோடி செலவில், கட்டப்பட்டுள்ள மாணவியர்க்கான விடுதிக் கட்டிடம் உள்ளிட்ட அரசு கலை மற்றும் அறிவியல் கல்லூரிகள், பொறியியல் கல்லூரிகள், அரசு பலவகை தொழில்நுட்பக் கல்லூரிகள் மற்றும் பல்கலைக்கழகம் ஆகியவற்றில் ரூ.120 கோடியே 2 லட்சத்து 80 ஆயிரம் செலவில் கட்டப்பட்டுள்ள வகுப்பறைக் கட்டிடங்கள், ஆய்வகக் கட்டிடங்கள், பணிமனைகள், விடுதிக் கட்டிடங்கள் போன்ற பல்வேறு கட்டிடங்களை திறந்து வைத்து, ரூ.207 கோடியே 82 லட்சத்து 47 ஆயிரம் செலவில் புதிதாக கட்டப்படவுள்ள உயர்கல்வித்துறை கட்டிடங்களுக்கும் முதல்வர் அடிக்கல் நாட்டினார்.

மேலும், நாடாளுமன்ற உறுப்பினர் வில்சனின் நாடாளுமன்ற உறுப்பினர் தொகுதி மேம்பாட்டு நிதியிலிருந்து ரூ.5 கோடி மதிப்பீட்டில் ராணிமேரி கல்லூரி வளாகத்தில் கட்டப்படவுள்ள கலையரங்கத்திற்கும் முதல்வர் அடிக்கல் நாட்டினார். முதல்வரால் திறந்து வைக்கப்பட்ட கட்டிடங்களுக்கும் அடிக்கல் நாட்டப்பட்ட கட்டிடங்களுக்கும் பெருந்தலைவர் காமராஜர் கல்லூரி மேம்பாட்டுத் திட்டத்தின் கீழ் ரூ.269.52 கோடி நிதி ஒதுக்கீடு செய்யப்பட்டுள்ளது குறிப்பிடத்தக்கது.

சென்னை, ராணி மேரி கல்லூரியில் கட்டப்பட்டுள்ள விடுதிக் கட்டிடம்: ராணி மேரி கல்லூரியில் கடந்த 2022ம் ஆண்டு நவ.22ம் தேதி நடைபெற்ற பட்டமளிப்பு விழாவில், முதல்வரிடம், ராணி மேரி கல்லூரி வளாகத்திலேயே மாணவியர் தங்கிப் படிப்பதற்கு ஏதுவாக விடுதி ஒன்றைக் கட்டித்தர வேண்டும் என மாணவியர்கள் கோரிக்கை வைத்தனர். அக்கோரிக்கையினை உடனே ஏற்றுக் கொண்டு விழா மேடையிலேயே விடுதி கட்டித் தரப்படும் என்று முதல்வர் அறிவித்தார். அந்த அறிவிப்பின்படி, ராணி மேரி கல்லூரியில் ரூ.42 கோடி ரூபாய் செலவில், நவீன வசதிகளுடன் 455 மாணவியர் தங்கிப் படிக்கும் வகையில் விடுதிக் கட்டிடம் கட்டப்பட்டது. இதனை முதல்வர் திறந்து வைத்து பார்வையிட்டார். பின்னர், அங்கு பயிலும் மாணவியர்களுடன் கலந்துரையாடினார்.

The post உயர்கல்வித் துறை சார்பில் ரூ.120.02 கோடியில் கட்டப்பட்டுள்ள கல்விசார் கட்டிடங்கள் திறப்பு appeared first on Dinakaran.