அமெரிக்காவுக்கு சட்டவிரோதமாக ஆள் கடத்தலில் ஈடுபட்ட முக்கிய குற்றவாளி கைது

புதுடெல்லி: அமெரிக்காவிற்கு சட்டவிரோதமாக ஆட்களை கடத்திய வழக்கில் முக்கிய குற்றவாளியை என்ஐஏ அதிரடியாக கைது செய்துள்ளது. டிரம்ப் அதிபராக பதவியேற்ற பிறகு சட்டவிரோத குடியேறிகளுக்கு எதிராக அமெரிக்க அரசு கடும் நடவடிக்கைகளை எடுத்து வருகிறது. சட்டவிரோத குடியேறிகளை அமெரிக்கா நாடு கடத்தி வருகிறது. கடந்த ஜனவரியில் இருந்து மார்ச் மாதம் வரை மொத்தம் 636 இந்தியர்கள் அமெரிக்காவில் இருந்து நாடு கடத்தப்பட்டுள்ளனர் என்று ஒன்றிய வெளியுறவு அமைச்சர் கீர்த்தி வர்தன் சிங் நாடாளுமன்றத்தில் தெரிவித்தார்.

பஞ்சாப் மாநிலம்,டரன் டரன் மாவட்டத்தை சேர்ந்த ஒருவர் கடந்த ஆண்டு அமெரிக்காவுக்கு சட்டவிரோதமாக அனுப்பப்பட்டார். அந்த நபரை அமெரிக்க அரசு கடந்த பிப்ரவரி மாதம் நாடு கடத்தியது. அவர் டெல்லியை சேர்ந்த ஏஜென்ட்டான ககன்தீப் சிங் என்ற கோல்டிக்கு ரூ.45 லட்சம் கொடுத்ததாகவும் அவர் மூலம் டாங்கி ரூட் வழியே அமெரிக்காவுக்கு அனுப்பப்பட்டதாக கூறினார். இது குறித்து பஞ்சாப் போலீசார் வழக்கு பதிவு செய்திருந்தனர். இந்த வழக்கு தேசிய புலனாய்வு முகமைக்கு(என்ஐஏ) மாற்றப்பட்டது. இது குறித்து விசாரித்து என்ஐஏ மேற்கு டெல்லி திலக்நகரில் கோல்டியை நேற்று கைது செய்தது.

The post அமெரிக்காவுக்கு சட்டவிரோதமாக ஆள் கடத்தலில் ஈடுபட்ட முக்கிய குற்றவாளி கைது appeared first on Dinakaran.