2 நாட்களில் ரூ.100 கோடி வசூல்...புதிய சாதனை படைத்த 'எல் 2 எம்புரான்'

சென்னை,

மோகன்லால் நடிப்பில், மலையாள நடிகர் பிருத்விராஜ் இயக்கத்தில் கடந்த 2019-ம் ஆண்டு வெளியான திரைப்படம் 'லூசிபர்'. இந்த படத்தின் மூலம் பிருத்விராஜ் இயக்குனராக அறிமுகமானார். தற்போது, இந்த படத்தின் 2-ம் பாகமாக  'எல் 2 எம்புரான்' வெளியாகி உள்ளது.

இதில், மோகன்லால், பிருத்விராஜ், மஞ்சுவாரியர், டோவினோ தாமஸ் உள்ளிட்ட பலர் நடித்திருக்கின்றனர். கடந்த 27-ம் தேதி வெளியான இப்படம் வசூல் ரீதியாகவும் விமர்சன ரீதியாகவும் நல்ல வரவேற்பை பெற்று வருகிறது.

இப்படம் முதல் நாளில் ரூ.22 கோடி ரூபாய் வசூலித்தது. இந்நிலையில், 48 மணிநேரத்தில் அதாவது 2 நாட்களில் ரூ. 100 கோடி வசூலித்திருப்பதாக படக்குழு அறிவித்துள்ளது. இதன் மூலம் அதிவேகமாக ரூ. 100 கோடி வசூல் செய்த மலையாள படம் என்ற புதிய சாதனையை 'எல் 2 எம்புரான்' படைத்திருக்கிறது.