18 ஆண்டு கால ஐ.பி.எல். வரலாற்றில் மோசமான சாதனை படைத்த பெங்களூரு

பெங்களூரு,

18-வது ஐ.பி.எல். தொடரில் பெங்களூரு சின்னசாமி ஸ்டேடியத்தில் நேற்றிரவு நடந்த 24-வது லீக் ஆட்டத்தில் ராயல் சேலஞ்சர்ஸ் பெங்களூரு - டெல்லி கேப்பிடல்ஸ் அணிகள் மோதின. இதில் டாஸ் வென்ற டெல்லி கேப்டன் அக்சர் படேல் பந்துவீச்சை தேர்வு செய்தார்.

அதன்படி முதலில் பேட்டிங் செய்த பெங்களூரு அணி 20 ஓவர்கள் முடிவில் 7 விக்கெட்டுக்கு 163 ரன்கள் எடுத்தது. அதிகபட்சமாக பில் சால்ட் மற்றும் டிம் டேவிட் தலா 37 ரன்கள் அடித்தார். டெல்லி தரப்பில் சுழற்பந்து வீச்சாளர்கள் குல்தீப் யாதவ், விப்ராஜ் நிகம் தலா 2 விக்கெட்டுகளை வீழ்த்தினர்.

அடுத்து 164 ரன் இலக்கை நோக்கி ஆடிய டெல்லி அணி 17.5 ஓவர்களில் 4 விக்கெட்டுக்கு 169 ரன்கள் சேர்த்து 6 விக்கெட் வித்தியாசத்தில் அபார வெற்றி பெற்றது. அதிகபட்சமாக கே.எல். ராகுல் 93 ரன்கள் அடித்தார். அவரே ஆட்ட நாயகனாகவும் தேர்வு செய்யப்பட்டார்.

இந்த போட்டியையும் சேர்த்து பெங்களூரு சின்னசாமி மைதானத்தில் ராயல் சேலஞ்சர்ஸ் பெங்களூரு அணி சந்தித்த 45-வது தோல்வி இதுவாகும். இதன் மூலம் 18 ஆண்டு கால ஐ.பி.எல். வரலாற்றில் குறிப்பிட்ட ஒரு மைதானத்தில் அதிக தோல்விகளை சந்தித்த அணி என்ற மோசமான சாதனையை ராயல் சேலஞ்சர்ஸ் பெங்களூரு படைத்துள்ளது.

அந்த பட்டியல்:

1. ராயல் சேலஞ்சர்ஸ் பெங்களூரு - 45 தோல்விகள் - பெங்களூரு சின்னசாமி மைதானம்

2. டெல்லி கேப்பிடல்ஸ் - 44 தோல்விகள் - டெல்லி அருண் ஜெட்லி மைதானம்

3. கொல்கத்தா நைட் ரைடர்ஸ் - 38 தோல்விகள் - கொல்கத்தா ஈடன் கார்டன்ஸ் மைதானம்

4. மும்பை இந்தியன்ஸ் - 34 தோல்விகள் - மும்பை வான்கடே மைதானம்

5. பஞ்சாப் கிங்ஸ் - 30 தோல்விகள் - மொகாலி