ஸ்டார்க் அபாரம்... சூப்பர் ஓவரில் ராஜஸ்தானை வீழ்த்தி டெல்லி வெற்றி

புதுடெல்லி,

18வது ஐ.பி.எல். கிரிக்கெட் தொடர் நாட்டின் பல்வேறு நகரங்களில் விறுவிறுப்பாக நடைபெற்று வருகிறது. இந்த தொடரில் இதுவரை 31 லீக் ஆட்டங்கள் முடிந்துள்ளன. இந்நிலையில், இந்த தொடரில் இன்று நடைபெற்ற 32-வது லீக் ஆட்டத்தில் டெல்லி கேப்பிடல்ஸ் - ராஜஸ்தான் ராயல்ஸ் அணிகள் ஆடி மோதின.

இதில் டாஸ் வென்ற ராஜஸ்தான் அணி முதலில் பந்துவீசுவதாக அறிவித்தது. தொடர்ந்து டெல்லியின் தொடக்க வீரர்களாக அபிஷேக் பொரெல் மற்றும் பிரேசர் மெக்கர்க் களம் இறங்கினர். இதில் மெக்கர்க் 9 ரன்னிலும், அடுத்து வந்த கருண் நாயர் ரன் எடுக்காமலும் அடுத்தடுத்து அவுட் ஆகினர்.

தொடர்ந்து பொரெல் மற்றும் கே.எல்.ராகுல் ஜோடி சேர்ந்தனர். இருவரும் நிதானமாக ஆடி ரன்கள் சேர்த்தனர். இதில் ராகுல் 38 ரன்னிலும், பொரெல் 49 ரன்னிலும் அவுட் ஆகினர். இதையடுத்து அக்சர் படேல் மற்றும் டிர்ஸ்டன் ஸ்டப்ஸ் ஜோடி சேர்ந்தனர். இதில் அக்சர் படேல் 14 பந்தில் 34 ரன் எடுத்து அவுட் ஆனார்.

இறுதியில் டெல்லி அணி 20 ஓவர்களில் 5 விக்கெட்டை இழந்து 188 ரன்கள் எடுத்தது. டெல்லி தரப்பில் அதிகபட்சமாக அபிஷேக் பொரெல் 49 ரன் எடுத்தார். ராஜஸ்தான் தரப்பில் ஆர்ச்சர் 2 விக்கெட் வீழ்த்தினார். இதையடுத்து 189 ரன் எடுத்தால் வெற்றி என்ற இலக்குடன் ராஜஸ்தான் அணி களமிறங்கியது.

அந்த அணியின் தொடக்க வீரர்களாக களமிறங்கிய ஜெய்ஸ்வால்-சஞ்சு சாம்சன் ஜோடி அதிரடியாக விளையாடி நல்ல தொடக்கத்தை அமைத்துக் கொடுத்தனர். இந்த நிலையில், சஞ்சு சாம்சன் 31 ரன்களில் காயம் காரணமாக வெளியேறினார். அடுத்து வந்த ரியான் பராக் 8 ரன்களில் அவுட் ஆன நிலையில், நிதிஷ் ராணாவுடன் ஜெய்ஸ்வால் ஜோடி சேர்ந்தார்.

அரைசதம் கடந்த ஜெய்ஸ்வால் 37 பந்துகளில் 51 ரன்கள் எடுத்த நிலையில், கேட்ச் ஆகி ஆட்டமிழந்தார். மறுமுனையில் நிதிஷ் ராணா அதிரடியாக விளையாடி 28 பந்துகளில் 51 ரன்கள் குவித்தார். இறுதி ஓவரில் 6 பந்துகளில் 9 ரன்கள் தேவை என்ற நிலையில், துருவ் ஜுரேல்-ஹெட்மேயர் களத்தில் இருந்தனர்.

இதையடுத்து கடைசி பந்தில் வெற்றிக்கு 2 ரன்கள் தேவைப்பட்டபோது, மிட்செல் ஸ்டார்க் வீசிய பந்தை எதிர்கொண்ட துருவ் ஜுரேல், 2 ரன்களுக்காக ஓடியபோது ரன் அவுட் ஆனார். இதன்படி 20 ஓவர்களில் ராஜஸ்தான் அணி 4 விக்கெட்டுகளை இழந்து 188 ரன்கள் எடுத்தது. இதனால் வெற்றியை தீர்மானிக்க சூப்பர் ஓவர் போடப்பட்டது.

இதில் முதலில் பேட்டிங் செய்த ராஜஸ்தான் அணியில் ஹெட்மேயர்-ரியான் பராக் களமிறங்கினர். அபாரமாக பந்துவீசிய மிட்செல் ஸ்டார்க், 2 விக்கெட்டுகளை வீழ்த்தினார். ராஜஸ்தான் அணி 11 ரன்கள் எடுத்த நிலையில், 12 ரன்கள் எடுத்தால் வெற்றி என்ற இலக்குடன் டெல்லி அணி களமிறங்கியது.

டெல்லி அணி சார்பில் சூப்பர் ஓவரில் ஸ்னப்ஸ்-கே.எல்.ராகுல் களமிறங்கினர். இந்த ஜோடி 4 பந்துகளில் 12 ரன்கள் எடுத்தது. இதையடுத்து சூப்பர் ஓவரில் ராஜஸ்தான் அணியை வீழ்த்தி டெல்லி அணி திரில் வெற்றி பெற்றது.