வெஸ்ட் இண்டீஸ்க்கு எதிரான டெஸ்ட்; முதல் நாள் முடிவில் பாகிஸ்தான் 143/4

முல்தான்,

வெஸ்ட் இண்டீஸ் கிரிக்கெட் அணி பாகிஸ்தானுக்கு சுற்றுப்பயணம் மேற்கொண்டு 2 போட்டிகள் கொண்ட டெஸ்ட் தொடரில் ஆடி வருகிறது. இரு அணிகளுக்கும் இடையிலான முதல் டெஸ்ட் போட்டி முல்தானில் இன்று தொடங்கியது. பனிப் பொழிவின் காரணமாக இந்த ஆட்டம் தாமதமாக தொடங்கியது. இந்த ஆட்டத்திற்கான டாசில் வென்ற பாகிஸ்தான் முதலில் பேட்டிங் செய்வதாக அறிவித்தது.

 பாகிஸ்தானின் தொடக்க ஆட்டக்காரர்களாக ஷான் மசூத் மற்றும் முகமது ஹுரைரா ஆகியோர் களம் இறங்கினர். இதில் முகமது ஹுரைரா 6 ரன், ஷான் மசூத் 11 ரன் எடுத்து ஆட்டம் இழந்தனர். தொடர்ந்து களம் இறங்கிய பாபர் அசாம் 8 ரன், கம்ரான் குலாம் 5 ரன் எடுத்து ஆட்டம் இழந்தனர். இதன் காரணமாக பாகிஸ்தான் அணி 46 ரன்னுக்கு 4 விக்கெட்டுகளை இழந்து தடுமாறியது.

இதையடுத்து சாத் ஷகீல் மற்றும் முகமது ரிஸ்வான் ஜோடி சேர்ந்து அணியை சரிவில் இருந்து மீட்டனர். இருவரும் நிதானமாக ஆடி ரன்கள் சேர்த்தனர். இந்த இணையை பிரிக்க முடியாமல் வெஸ்ட் இண்டீஸ் அணியினர் திணறினர். நிதானமாக ஆடிய இருவரும் அரைசதம் அடித்து அசத்தினர். பாகிஸ்தான் அணி 41.3 ஓவர்களில் 4 விக்கெட்டுகளை இழந்து 143 ரன்கள் எடுத்திருந்த போது போதிய வெளிச்சமின்மை காரணமாக தடைப்பட்டது.

அதன்பின்னர் நிலைமை சரியாகாததால் முதல் நாள் ஆட்டம் அத்துடன் முடிக்கப்பட்டது. பாகிஸ்தான் தரப்பில் சாத் ஷகீல் 56 ரன்னுடனும், முகமது ரிஸ்வான் 51 ரன்னுடனும் களத்தில் உள்ளனர். வெஸ்ட் இண்டீஸ் தரப்பில் ஜெய்டன் சீல்ஸ் 3 விக்கெட்டும், குடகேஷ் மோடி 1 விக்கெட்டும் வீழ்த்தி உள்ளனர். நாளை 2ம் நாள் ஆட்டம் நடைபெறுகிறது.