வெண்ணந்தூர் அருகே தங்கையாக பழகி மாணவியை மனைவியாக்கிய எலக்ட்ரீசியன்

*6 மாதத்திற்கு பின் கர்ப்பிணியாக மீட்பு

*பெற்றோர், உறவினர்கள் மறியலால் பரபரப்பு

ராசிபுரம் : நாமக்கல் அருகே, கல்லூரி மாணவியை கடத்திச் சென்று கர்ப்பமாக்கிய எலக்ட்ரீசியன் மீது நடவடிக்கை எடுக்க கோரி, மாணவியின் பெற்றோர் மற்றும் உறவினர்கள் மறியலில் ஈடுபட்டதால் பரபரப்பு ஏற்பட்டது.நாமக்கல் மாவட்டம், வெண்ணந்தூர் அருகே சப்பையாபுரம் வேட்டைக்காரன் வீதியை சேர்ந்தவர் விஜயகுமார்(39), எலக்ட்ரீசியன். இவருக்கு கோகிலா(31) என்ற மனைவியும், 8வயதில் மகளும், 7வயதில் மகனும் உள்ளனர்.

அதே பகுதியை சேர்ந்த 19 வயது இளம்பெண் அரசு கல்லூரியில் படித்து வந்தார். அந்த இளம்பெண், விஜயகுமாரிடம் அண்ணன் என்ற முறையில் பழகி வந்துள்ளார். அவரை தினமும் தனது டூவீலரில் கல்லூரிக்கு அழைத்து செல்வதை, விஜயகுமார் வழக்கமாக கொண்டிருந்தார். கடந்த ஆகஸ்ட் மாதம், ஆட்டையாம்பட்டியில் உள்ள பெரியமாரியம்மன் கோயில் விழாவிற்கு, தனது தாயுடன் சென்ற கல்லூரி மாணவி, திடீரென மாயமானார்.

இதையடுத்து, மகளை காணவில்லை என அவரது பெற்றோர், ஆட்டையாம்பட்டி போலீஸ் ஸ்டேஷனில் புகார் அளித்தனர். அதேபோல், விஜயகுமாரையும் காணவில்லை என அவரது குடும்பத்தினர், வெண்ணந்தூர் போலீஸ் ஸ்டேஷனில் புகார் அளித்தனர். இந்நிலையில், தலைமறைவாக இருந்த மாணவியையும், விஜயகுமாரையும் வெண்ணந்தூர் போலீசார், நேற்று காலை கண்டுபிடித்து போலீஸ் ஸ்டேஷனுக்கு அழைத்து வந்தனர்.

அப்போது, விஜயகுமார் ஆசைவார்த்தை கூறி மாணவியை அழைத்து சென்றதும், அவர் தற்போது 5 மாதம் கர்ப்பமாக இருந்ததும் தெரியவந்தது. இதையடுத்து, தனது மகளுக்கு நீதி கேட்டு அவரது பெற்றோர் மற்றும் உறவினர்கள், சப்பையபுரம் பிரிவு ரோடு பகுதியில், நேற்று சாலை மறியலில் ஈடுபட்டனர். இதனால் அவ்வழியாக போக்குவரத்து பாதிக்கப்பட்டது. தகவல் அறிந்த வெண்ணந்தூர் போலீசார், சம்பவ இடத்திற்கு சென்று சமரச பேச்சுவார்த்தை நடத்தியதையடுத்து, அவர்கள் கலைந்து சென்றனர்.

இச்சம்பவம் குறித்து, வெண்ணந்தூர் போலீசார் இரு தரப்பிடமும் விசாரணை நடத்தினர். பின்னர், மாணவியை காணவில்லை என ஆட்டையாம்பட்டி போலீஸ் ஸ்டேஷனில் புகார் கொடுத்திருந்ததால், வழக்கை ஆட்டையாம்பட்டி போலீஸ் ஸ்டேஷனுக்கு போலீசார் மாற்றினர். இந்த சம்பவம், வெண்ணந்தூர் பகுதியில் பரபரப்பை ஏற்படுத்தி உள்ளது.

The post வெண்ணந்தூர் அருகே தங்கையாக பழகி மாணவியை மனைவியாக்கிய எலக்ட்ரீசியன் appeared first on Dinakaran.