வாளையார் அருகே பரபரப்பு வாலிபரை காரில் கடத்தி ரூ.1.10 லட்சம் பறிப்பு

மதுக்கரை, ஏப்.2: திருச்சூர் மாவட்டம் மானங்கொத்து பகுதியை சேர்ந்தவர் சிவராகுல்(19). அந்த பகுதியில் உள்ள நகை பட்டறையில் வேலை செய்து வருகிறார். இந்த நிலையில் இவர் கோடை சீசனையொட்டி தர்பூசணி வியாபாரம் செய்வதற்காக ரூ.1 லட்சத்து 10 ஆயிரம் ரூபாய் பணத்தை எடுத்துக்கொண்டு நேற்று காலை பைக் மூலம் கோவை உக்கடம் பகுதிக்கு வந்து தர்பூசணி விலையை விசாரித்துள்ளார். விலை அதிகம் என்பதால், பணத்துடன் மீண்டும் திருச்சூருக்கு திரும்பி சென்றார்.

அவர் நேற்று மாலை, மதுக்கரை வீரப்பனூர் அருகே வந்தபோது, காரில் அவரை பின்தொடர்ந்து வந்த கும்பல், பைக்கை வழிமறித்து, சிவ ராகுலை காரில் தூக்கிப்போட்டு கடத்தி சென்றனர். அந்த கார், சேலம், கொச்சின் பைபாஸ் ரோட்டிற்கு வந்து வாளையார் அருகே நிறுத்தி, அவரிடம் இருந்த பணம் ரூ.1.10 லட்சத்தை பறித்துக்கொண்டு, காரில் இருந்து கீழே தள்ளிவிட்டு சென்றனர். இதனால் அதிர்ச்சியடைந்த சிவ ராகுல், தனது மாமா கிருஷ்ணமுத்திக்கு தகவல் கொடுத்து வரவழைத்து க.க சாவடி காவல் நிலையத்தில் புகார் அளித்தார். இதுகுறித்து போலீசார் வழக்குபதிந்து விசாரணை நடத்தி வருகின்றனர்.

The post வாளையார் அருகே பரபரப்பு வாலிபரை காரில் கடத்தி ரூ.1.10 லட்சம் பறிப்பு appeared first on Dinakaran.