முட்டுக்காடு இசிஆரில் நள்ளிரவு பெண்கள் சென்ற காரை துரத்திய இளைஞர்கள்: தனிப்படை புலன் விசாரணை

துரைப்பாக்கம், ஜன.30: மாமல்லபுரத்தில் இருந்து சென்னை நோக்கி கிழக்கு கடற்கரை சாலை வழியாக முட்டுக்காடு பகுதிக்கு கடந்த 3 நாட்களுக்கு முன்பு கார் ஒன்று சென்றுள்ளது. இந்த காரில் பெண்கள் மற்றும் உறவினர்கள் இருந்துள்ளனர். அப்போது, பெண்கள் சென்ற காருக்கு பின்னால் மற்றொரு கார் முந்திச்செல்ல முயன்றுள்ளது. அப்போது, பெண்கள் வந்த கார், இளைஞர்களின் கார் மீது உரசியுள்ளது. இதனால், இளைஞர்கள் காரில் மின்னல் வேகத்தில் சென்று பெண்களை சென்ற கார் முன்பு தங்களது காரை நிறுத்தி அவர்களிடம் தகராறு செய்து மிரட்டிவிட்டு சென்றுள்ளனர்.

இதனால் அதிர்ச்சியடைந்த பெண்கள், இதுகுறித்து கானத்தூர் காவல் நிலையத்தில் புகார் அளித்துள்ளனர். புகாரின்பேரில், போலீசார் நடத்திய விசாரணையில், பெண்கள் ஓட்டிச்சென்ற கார், இளைஞர்கள் சென்ற கார் மீது உரசியபடி சென்றுள்ளது. மேலும், தாறுமாறாக காரை ஓட்டி சென்றுள்ளனர். இதனால், கோபமடைந்த இளைஞர்கள், பெண்கள் ஓட்டிச்சென்ற காரை சிறிதுதூரம் விரட்டிச்சென்று மடக்கி தகராறு செய்துள்ளனர் என்பது தெரியவந்துள்ளது. இதுகுறித்து, வழக்குப்பதிவு செய்த போலீசார், காரில் வந்த இளைஞர்கள் யார் என்பது குறித்து விசாரணை நடத்தி வருகின்றனர். இச்சம்பவத்தை காரில் வந்த பெண்கள், வீடியோவாக பதிவு செய்து சமூக வலைதளத்தில் வெளியிட்டுள்ளது பரபரப்பை ஏற்படுத்தியுள்ளது.

இதுதொடர்பாக, தாம்பரம் மாநகர காவல்துறை வெளியிட்ட அறிக்கை: கடந்த 26ம் தேதி சின்னி திலங்க என்ற பெண் கானத்தூர் காவல் நிலையத்தில் நேரில் ஆஜராகி, 25ம் தேதி அதிகாலை 2 மணி அளிவில் காரில் முட்டுக்காடு பாலம் அருகே வந்த போது, 2 கார்களில் வந்த 7, 8 பேர் திடீரென வழிமறித்து பிரச்னை செய்ததாக தெரிவித்தார். அவரது புகாரின் பேரில் கானத்தூர் காவல் நிலைய மனு ரசீது 26ம் ேததி வழங்கப்பட்டு, விசாரணை நடந்து தொடர்ந்து கானத்தூர் காவல் நிலையம் பிஎன்எஸ் 126(2), 296(பி), 324(2) மற்றும் தமிழ்நாடு பெண்கள் வன்கொடுமை தடுப்பு சட்டம் பிரிவுகளின் கீழ் வழக்கு பதிவு செய்யபட்டு புலன் விசாரணை நடக்கிறது. இதில் தொடர்புடைய குற்றவாளிகளை விரைந்து கைது செய்யவும், குற்றவாளிகள் பயன்படுத்திய கார்களை பறிமுதல் செய்யவும் அதன் தொடர்ச்சியாக கிழக்கு கடற்கரை சாலையில் உள்ள சிசிடிவி காட்சிகளை ஆய்வு செய்து 3 தனிப்படைகள் அமைக்கப்பட்டு துரித புலன் விசாரணை நடந்து வருகிறது. இவ்வாறு கூறப்பட்டுள்ளது.

The post முட்டுக்காடு இசிஆரில் நள்ளிரவு பெண்கள் சென்ற காரை துரத்திய இளைஞர்கள்: தனிப்படை புலன் விசாரணை appeared first on Dinakaran.