மது போதை தகராறில் நண்பரை கொலை செய்துவிட்டு டெல்லியில் பதுங்கியவர் கைது

தண்டையார்பேட்டை: சவுகார்பேட்டை, பொன்னப்பன் தெருவில் ஹரிஷ்குமார் (29) என்பவருக்கு சொந்தமான ஸ்டீல் பட்டறை உள்ளது. இங்கு, உத்தரபிரதேச மாநிலத்தை சேர்ந்த முகமது சதாப் (20) என்பவர் தங்கி வேலை செய்து வந்தார். இந்நிலையில், கடந்த 25ம் தேதி இரவு, முகமது சதாப்பின் நண்பரான உத்தரபிரதேசத்தை சேர்ந்த முகமது சலீம் (28) என்பவர், இவரை பார்க்க வந்துள்ளார். அப்போது, இருவரும் அமர்ந்து மது அருந்தியுள்ளனர். பின்னர், செல்போன் பார்ப்பதில் அவர்களுக்குள் தகராறு ஏற்பட்டது. இதில், ஆத்திரமடைந்த சலீம், அங்கிருந்த எடை கல்லை எடுத்து முகமது சதாப்பின் தலையில் அடித்து விட்டு தப்பியோடினர்.

இதில், முகமது சதாப் சம்பவ இடத்திலேயே பரிதாபமாக பலியானார். தகவலறிந்து வந்த யானைக்கவுனி போலீசார், சடலத்தை கைப்பற்றி பிரதே பரிசோதனைக்காக அரசு மருத்துவமனைக்கு அனுப்பி வைத்தனர். மேலும், இதுகுறித்து வழக்கு பதிவு செய்து, தனிப்படை அமைத்து, தப்பியோடிய சலீமை தேடி வந்தனர். இதனிடையே, முகமது சலீம், ரயில் மார்க்கமாக உத்தரபிரதேசம் சென்றது தெரியவந்தது. அவரை, தேடிச் சென்ற போது, அவர் டெல்லியில் பதுங்கி இருப்பது தெரிந்தது. அங்கு வைத்து அவரை கைது செய்தனர். பின்னர் அங்குள்ள நீதிமன்றத்தில் ஆஜர்படுத்தி, நேற்று சென்னை அழைத்து வந்து, விசாரணை நடத்தி வருகின்றனர்.

The post மது போதை தகராறில் நண்பரை கொலை செய்துவிட்டு டெல்லியில் பதுங்கியவர் கைது appeared first on Dinakaran.