பொள்ளாச்சி பாலியல் வழக்கு; குற்றம்சாட்டப்பட்ட 9 பேரும் கோவை சிபிஐ கோர்ட்டில் ஆஜர்

கோவை: பொள்ளாச்சி பாலியல் வழக்கில் அரசு தரப்பு சாட்சி விசாரணை நிறைவு பெற்றது. குற்றம் சாட்டப்பட்ட 9 பேரும் சேலம் மத்திய சிறையில் இருந்து இன்று பலத்த போலீஸ் பாதுகாப்புடன் கோவை சிபிஐ கோர்ட்டுக்கு போலீசார் அழைத்து வந்தனர். கோவை மாவட்டம், பொள்ளாச்சியில் 8-க்கும் ேமற்பட்ட இளம்பெண்களை வீடியோ எடுத்து, பாலியல் வன்கொடுமை செய்த சம்பவம் தொடர்பாக பாதிக்கப்பட்ட இளம்பெண்கள் புகார் அளித்ததின்பேரில், பொள்ளாச்சி போலீசார் முதலில் விசாரித்த நிலையில், இந்த வழக்கு சிபிசிஐடிக்கு மாற்றப்பட்டு, பின்னர் சிபிஐக்கு மாற்றம் செய்யப்பட்டது.

இந்த வழக்கு தொடர்பாக, பொள்ளாச்சியை சேர்ந்த திருநாவுக்கரசு (25), சபரிராஜன் (25), வசந்தகுமார் (27), சதீஷ் (28), மணிவண்ணன் (25) ஆகிய 5 பேர் கடந்த 2019-ம் ஆண்டும், ஹேரேன் பால் (29), பாபு என்கிற பைக் பாபு (34), அருளானந்தம் (34), அருண்குமார் ஆகிய 4 பேர் கடந்த 2021-ம் ஆண்டும் கைது செய்யப்பட்டனர். கைதான 9 பேரும் சேலம் மத்திய சிறையில் அடைக்கப்பட்டனர். இவர்கள் மீதான வழக்கு விசாரணை கோவை சிபிஐ நீதிமன்றத்தில் நடந்து வருகிறது. இவ்வழக்கில், 50-க்கும் மேற்பட்ட அரசுத்தரப்பு சாட்சியங்கள், சுமார் 200 ஆவணங்கள், 40 மின்னணு தரவுகள் உள்பட பறிமுதல் செய்யப்பட்ட அனைத்து பொருட்களும் விசாரணைக்கு சேர்க்கப்பட்டு, நீதிமன்றத்தில் சமர்ப்பிக்கப்பட்டன.

இந்த வழக்கில், பாதிக்கப்பட்டவர்கள் 8 பேர், விசாரணையின்போது, குற்றம் சாட்டப்பட்டவர்களுக்கு எதிராக சாட்சியம் அளித்துள்ளனர். இவ்வழக்கில், ஒவ்வொரு வாய்தாவின்போதும், குற்றம்சாட்டப்பட்ட 9 பேரும் சேலம் சிறையில் இருந்தபடியே வீடியோ கான்பரன்சிங் மூலம் நீதிபதி முன்னிலையில் ஆஜர்படுத்தப்பட்டனர். தற்போது இவ்வழக்கில், அரசு தரப்பு சாட்சியங்கள் நிறைவுபெற்றுள்ளன. இதையடுத்து, கைதான 9 பேரிடம், சட்ட விதிகள் 313-ன் கீழ் கேள்விகள் கேட்பதற்கு கோர்ட்டில் ஆஜர்படுத்தும்படி நீதிபதி உத்தரவிட்டார். அதன்படி, திருநாவுக்கரசு உள்பட 9 பேரும் இன்று காலை சேலத்தில் இருந்து பலத்த போலீஸ் பாதுகாப்புடன் அழைத்து வரப்பட்டு, கோவை சிபிஐ நீதிமன்றத்தில், நீதிபதி ஆர்.நந்தினிதேவி முன்னிலையில் ஆஜர்படுத்தப்பட்டனர். வழக்கு விசாரணை தொடர்ந்து நடந்து வருகிறது.

The post பொள்ளாச்சி பாலியல் வழக்கு; குற்றம்சாட்டப்பட்ட 9 பேரும் கோவை சிபிஐ கோர்ட்டில் ஆஜர் appeared first on Dinakaran.