பொதுமக்களை தாக்கிய 3 இளைஞர்கள் கைது

ராசிபுரம், ஜன.19: ராசிபுரம் அருகே டூவீலரில் வேகமாக வந்ததை தட்டிக்கேட்ட முதியவர் மற்றும் பொதுமக்களை தாக்கிய 3 வாலிபர்களை கைது செய்த போலீசார், தலைமறைவாக உள்ள மேலும் ஒருவரை தேடி வருகின்றனர். நாமக்கல் மாவட்டம், ராசிபுரம் கவுண்டம்பாளையம் பகுதியை சேர்ந்தவர் சுடலைமுத்து (70). இவர் கடந்த 16ம் தேதி, வீதியில் நடந்து சென்றபோது, அவ்வழியாக டூவீலரில் வேகமாக வந்த வாலிபர்கள், அவர் மீது மோதுவது போல் சென்றனர். இதனால் அதிர்ச்சியடைந்த சுடலைமுத்து, அந்த வாலிபர்களை திட்டியுள்ளார். இதில் ஆத்திரமடைந்த அவர்கள், சுடலைமுத்துவை சரமாரியாக தாக்கினர். இதை தடுக்க வந்த அப்பகுதியை சேர்ந்த பொதுமக்களையும், தங்களின் நண்பர்களுடன் சேர்ந்து தாக்கினர். இதில் காயமடைந்த 10க்கும் மேற்பட்டோர், ராசிபுரம் அரசு மற்றும் தனியார் மருத்துவமனையில் சிகிச்சைக்கு சேர்க்கப்பட்டனர்.

இதனிடையே, டூவீலரில் வேகமாக வந்து ரகளையில் ஈடுபட்டு தாக்கிய வாலிபர்களை கைது செய்யாததை கண்டித்து, நேற்று முன்தினம் இரவு, பொதுமக்கள் திடீர் சாலை மறியலில் ஈடுபட்டனர். தகவல் அறிந்து சம்பவ இடத்துக்கு வந்த ராசிபுரம் போலீசார், சமாதானம் செய்து அனுப்பி வைத்தனர். இந்நிலையில், இரவில் கத்தியுடன் சுற்றிய மற்றும் வழக்கில் தேடப்பட்டு வந்த சஞ்சயின் கோஷ்டியை சேர்ந்த கவுண்டம்பாளையத்தை சேர்ந்த சண்முகம் மகன் சந்தோஷ்(25), குருக்கபுரம் பெரியசாமி மகன் சிவராஜ்(26) ஆகிய இருவரையும் ைகது செய்த போலீசார், தொடர்ந்து சஞ்சயையும் கைது செய்தனர். பின்னர், அவர்களை நீதிமன்றத்தில் ஆஜர்படுத்தி சிறையில் அடைத்தனர். மேலும், தலைமறைவாக உள்ள மணிகண்டனை தேடி வருகின்றனர்.

The post பொதுமக்களை தாக்கிய 3 இளைஞர்கள் கைது appeared first on Dinakaran.