புதிய அனல் மின் நிலைய திட்டங்களுக்கு ஒடிசா சுரங்கங்களில் இருந்து நிலக்கரி எடுப்பதற்கான பணிகள் தொடக்கம்: விரைவில் ஆலோசகர் நியமனம்; மின் வாரிய அதிகாரிகள் தகவல்

சென்னை: புதிய அனல் மின் நிலைய திட்டங்களுக்கு ஒடிசா சுரங்கங்களில் நிலக்கரி எடுப்பதற்கான பணிகள் தொடங்கியுள்ளதாகவும், விரைவில் ஆலோசகர் நியமிக்கப்படவுள்ளதாகவும் மின்வாரிய அதிகாரிகள் தெரிவித்தனர். தமிழ்நாடு மின்வாரியம் அனல் மின்நிலையங்கள், எரிவாயு மின் நிலையங்கள், நீர்மின் நிலையங்கள், சூரிய சக்தி, காற்றாலை உள்ளிட்ட பல்வேறு ஆதாரங்கள் மூலம் மின் உற்பத்தி செய்து வருகிறது. ஆனால் தமிழ்நாடு மின் வாரியம் அனல் மின் நிலைய மின் உற்பத்தியே பிரதானமாக இருக்கிறது. அனல் மின் நிலையங்களுக்கு எரிபொருளாக நிலக்கரி பயன்படுத்தப்படுகிறது.

இந்த நிலக்கரி பெரும்பாலான அளவில் உள்நாட்டு நிலக்கரி சுரங்கங்களில் இருந்து பெறப்படுகிறது. தேவைக்கு ஏற்ப வெளிநாடுகளில் இருந்தும் கொள்முதல் செய்யப்படுகிறது. ஒன்றிய அரசு ஒடிசா, சத்தீஸ்கர் உள்ளிட்ட மாநிலங்களில் இருக்கும் நிலக்கரி சுரங்கங்களை ஒதுக்க, கடந்த ஆண்டு தொடக்கத்தில் ஏலம் நடத்தியது. அதில், ஒடிசா மாநிலம் அங்குல் மாவட்டத்தில் உள்ள சகிகோபால் ககுரி சுரங்கங்கள் நிலக்கரி எடுப்பதற்கான ஒப்பந்தத்தை தமிழ்நாடு மின்வாரியம் பெற்றது. இந்நிலையில் சுரங்கங்களில் நிலக்கரி எடுப்பதற்கான பணிகளுக்காக விரைவில் ஆலோசகரை நியமிக்கப்படவுள்ளதாக மின் வாரிய அதிகாரிகள் தெரிவித்துள்ளனர்.

இதுகுறித்து மின் வாரிய அதிகாரிகள் கூறியதாவது: சகிகோபால் ககுரி சுரங்கம் 6.53 சதுர கிமீ பரப்பளவில் 421.44 மில்லியன் மெட்ரிக் டன் ஜி11 தர நிலக்கரியை கொண்டுள்ளது. இதற்காக நியமிக்கப்படும் ஆலோசகர் சுரங்கத்தை ஆய்வு செய்வதற்காக நிறுவனத்தை தேர்ந்தெடுக்க உதவுவார். மேலும் நிலக்கரி எடுக்க, அதை தமிழ்நாட்டிற்கு கொண்டுவர நிறுவனங்களை இறுதி செய்வார். நிலக்கரி சுரங்கத்தின் தற்போதைய புவி-சுரங்கத் தரவு மற்றும் புவியியல் அறிக்கையை பகுப்பாய்வு செய்து மேலும் தரவு தேவைகள் மற்றும் தேவையான ஆய்வுகளை அடையாளம் காண்பார்.

இது எதிர்காலத்தில் மேற்கொள்ளப்படும் ஆய்வு தோண்டுதல், புவி இயற்பியல் ஆய்வு, புவி தொழில்நுட்ப மற்றும் நீர் புவியியல் ஆய்வுகள் ஆகியவை அடங்கும். மேலும் சுற்றுச்சூழல் மற்றும் வன அமைச்சகம் மற்றும் பிறரிடமிருந்து தேவையான ஒப்புதல்கள் மற்றும் அனுமதிகளைப் பெறுவார். தமிழ்நாட்டில் தற்போது 4,320 மெகாவாட் திறன் கொண்ட அனல் மின் நிலையங்களுக்கு ஆண்டுக்கு 22.34 மில்லியன் டன் நிலக்கரி தேவைப்படுகிறது. உள்நாட்டு நிலக்கரி தற்போது மகாநதி கோல்பீல்ட்ஸ் லிமிடெட் மற்றும் சிங்கரேணி காலியரீஸ் கம்பெனி லிமிடெட் ஆகியவற்றிலிருந்து வாங்கப்படுகிறது.

உடன்குடி மற்றும் எண்ணூர் அனல் ஆலைகள் கட்டி முடிக்கப்படும் போது, ​​உள்நாட்டு நிலக்கரி தேவை 30சதவீதம் அதிகரிக்கும் என எதிர்பார்க்கப்படுகிறது. புதிய அனல் மின் நிலைய திட்டங்களுக்கு இந்த சுரங்களில் இருந்து எடுக்கப்படும் நிலக்கரி மிகவும் உதவியாக அமையும். 2016ம் ஆண்டில் நடந்த ஏலத்தில் 896 மில்லியன் டன்கள் இருப்புத் திறனுடன் ஒடிசாவில் சந்திரபிலா நிலக்கரித் தொகுதியை வென்றது. இருப்பினும், புலிகள் வழித்தடத்திற்கு அருகாமையில் இருப்பதாகக் கூறி, சுற்றுச்சூழல் மற்றும் வன அமைச்சகம் அனுமதி மறுத்ததால், தமிழக மின் வாரியத்தால் சுரங்க உரிமம் பெற முடியவில்லை. எனவே, சந்திரபிலா நிலக்கரித் தொகுதியை உருவாக்கும் திட்டம் 2023ல் கைவிடப்பட்டது. இவ்வாறு அவர்கள் கூறினர்.

The post புதிய அனல் மின் நிலைய திட்டங்களுக்கு ஒடிசா சுரங்கங்களில் இருந்து நிலக்கரி எடுப்பதற்கான பணிகள் தொடக்கம்: விரைவில் ஆலோசகர் நியமனம்; மின் வாரிய அதிகாரிகள் தகவல் appeared first on Dinakaran.