பிளஸ் 2 மாணவிகளிடம் சில்மிஷம்:ஆசிரியர் கைது

திருவனந்தபுரம்: கோழிக்கோடு அருகே பிளஸ் 2 மாணவிகள் 2 பேரிடம் பாலியல் சீண்டலில் ஈடுபட்ட ஆசிரியரை போலீசார் கைது செய்தனர். கேரள மாநிலம் கோழிக்கோடு அருகே உள்ள ஓமசேரி பகுதியை சேர்ந்தவர் நிஜ் (48). இவர் அப்பகுதியில் உள்ள ஒரு தனியார் மேல்நிலைப் பள்ளியில் ஆசிரியராக பணிபுரிந்து வருகிறார். இந்நிலையில், சில தினங்களுக்கு முன் இவர் இந்தப் பள்ளியில் பிளஸ் 2 படிக்கும் 2 மாணவிகளிடம் பாலியல் அத்துமீறலில் ஈடுபட்டதாக கூறப்படுகிறது.

இது குறித்து அந்த மாணவிகள் தங்களின் பெற்றோரிடம் கூறி அழுதுள்ளனர். இதையடுத்து பாதிக்கப்பட்ட மாணவிகளின் பெற்றோர் தாமரைசேரி போலீசில் புகார் செய்தனர். இதன்பேரில் விசாரணை நடத்திய போலீசார் போக்சோ பிரிவில் வழக்கு பதிவு செய்து ஆசிரியர் நிஜ்ஜை நேற்று கைது செய்தனர். பின்னர் அவரை நீதிமன்றத்தில் ஆஜர்படுத்தி சிறையில் அடைத்தனர்.

ஆசிரியர் நிஜ் இதற்கு முன்னதாக சில பள்ளி மாணவர்களை தாக்கியதாகவும், சக ஆசிரியர்கள் மற்றும் மாணவர்களின் பெற்றோருக்கு கொலை மிரட்டல் விடுத்ததாகவும் 2 போலீஸ் நிலையங்களில் ஏற்கனவே வழக்குகள் உள்ளன என்பது குறிப்பிடத்தக்கது.

The post பிளஸ் 2 மாணவிகளிடம் சில்மிஷம்:ஆசிரியர் கைது appeared first on Dinakaran.