பாலமேடு ஜல்லிக்கட்டு: பட்டையை கிளப்பிய பார்த்திபனுக்கு முதல் பரிசு | அனல் பறந்த தருணங்கள்

மதுரை: மதுரை பாலமேட்டில் புதன்கிழமை நடைபெற்ற ஜல்லிக்கட்டில் சீறி பாய்ந்த நூற்றுக்கணக்கான காளைகளை மாடுபிடி வீரர்கள் அடக்கினர். திண்டுக்கல் மாவட்டம் நத்தத்தைச் சேர்ந்த பார்த்திபன் 14 காளைகளை அடக்கி முதலிடம் பிடித்தார். இவருக்கு துணை முதல்வர் சார்பில் கார் பரிசு வழங்கப்பட்டது. பாலமேடு ஜல்லிக்கட்டில் காளைகள் முட்டியதில் 40-க்கும் மேற்பட்டோர் காயமடைந்தனர்.

பாலமேட்டில் மஞ்சமலை சுவாமி ஜல்லிக்கட்டு விழா மஞ்சமலை ஆற்றில் நடைபெற்றது. பாலமேடு கிராம பொது மகாலிங்க சுவாமி மடத்துக் கமிட்டி மற்றும் மாவட்ட நிர்வாகம் சார்பில் இவ்விழா நடைபெற்றது. முன்னதாக, காலை 7.35 மணியளவில் அமைச்சர் பி.மூர்த்தி தலைமையில், ஆட்சியர் சங்கீதா உறுதிமொழி வாசிக்க மாடுபிடி வீரர்கள் உறுதிமொழி ஏற்றனர்.