பார்டர் - கவாஸ்கர் டிராபி; பும்ரா,ஸ்டார்க் அல்ல... இவர் தான் அதிக விக்கெட் எடுப்பார் - ரிக்கி பாண்டிங்

மெல்போர்ன்,

இந்திய கிரிக்கெட் அணி சமீபத்தில் சொந்த மண்ணில் நியூசிலாந்துக்கு எதிராக நடைபெற்ற 3 போட்டிகள் கொண்ட டெஸ்ட் தொடரை முழுமையாக இழந்தது. இதையடுத்து இந்திய அணி ஆஸ்திரேலியாவுக்கு சுற்றுப்பயணம் மேற்கொண்டு 5 போட்டிகள் கொண்ட டெஸ்ட் (பார்டர்-கவாஸ்கர் தொடர்) தொடரில் ஆட உள்ளது.

இந்த தொடர் வரும் 22ம் தேதி தொடங்குகிறது. தற்போது இந்திய அணி உலக டெஸ்ட் சாம்பியன்ஷிப் இறுதிப் போட்டிக்கு முன்னேற ஆஸ்திரேலியா அணிக்கு எதிராக 5 போட்டிகள் கொண்ட டெஸ்ட் தொடரில் 4 போட்டிகளை வென்றாக வேண்டிய கட்டாயத்தில் இருக்கிறது.

இந்நிலையில், பார்டர் - கவாஸ்கர் டெஸ்ட் தொடரில் பும்ரா, மிட்செல் ஸ்டார்க்கை விட ஆஸ்திரேலியாவின் ஜோஷ் ஹேசில்வுட் தான் அதிக விக்கெட் எடுப்பார் என ஆஸ்திரேலிய முன்னாள் வீரரான ரிக்கி பாண்டிங் கூறியுள்ளார். இது தொடர்பாக அவர் கூறியதாவது,

வேகப்பந்துவீச்சாளர் ஹேசில்வுட் தற்போது சரியான நிலையில் இருப்பதாக உணர்கிறேன். மேலும் அவரது ஆற்றல் மற்ற வீரர்களை காட்டிலும் சிறந்த நிலையில் இருப்பது போன்று தோன்றுகிறது. இதனால் இந்திய அணிக்கு எதிரான ஐந்து டெஸ்ட் போட்டிகள் கொண்ட தொடரில் அவரே அதிக விக்கெட் வீழ்த்தக் கூடிய வீரராக இருப்பார். இவ்வாறு அவர் கூறினார்.