பரந்தூரில் விஜய் பங்கேற்கும் கூட்டத்தை அம்பேத்கர் திடலில் நடத்த முடிவு: சீரமைப்பு பணி தீவிரம்

காஞ்சிபுரம்: பரந்தூர் விமான நிலைய எதிர்ப்பு போராட்டக் குழு மற்றும் பொதுமக்களுடன் விஜய் பங்கேற்கும் சந்திப்புக் கூட்டம் ஏகனாபுரம் அம்பேத்கர் சிலை அருகே உள்ள திடலில் நடத்துவதா? திருமணம மண்டபத்தில் நடத்துவதா என்பதில் இருந்த இழுபறி முடிவுக்கு வந்தது. பொதுமக்களுக்கு வசதியாக அம்பேத்கர் சிலை அருகே உள்ள திடலில் நடத்த தமிழக வெற்றிக் கழக நிர்வாகிகள், போராட்டக் குழுவினர் முடிவு செய்துள்ளனர்.

சென்னையின் 2-வது விமான நிலையம் காஞ்சிபுரம் அருகே பரந்தூரில் அமைகிறது. இந்த விமான நிலையத்துக்காக பரந்தூர் மற்றும் சுற்றியுள்ள பகுதிகளில் உள்ள 13 கிராமங்களில் இருந்து 5100 ஏக்கர் விவசாய நிலம் கையகப்படுத்தப்பட உள்ளது. இதில் ஏகனாபுரம் உள்ளிட்ட கிராமங்கள் முற்றிலும் கையகப்படுத்தப்பட உள்ளதால் அந்த கிராமத்தை மையமாக வைத்து பல்வேறு போராட்டங்கள் நடைபெற்று வருகின்றன.