நெஞ்சு வலியால் சாலையில் சரிந்து போராடிய இளைஞர்: உயிரை காப்பாற்றிய போக்குவரத்து போலீஸாருக்கு பாராட்டு

சென்னை: நெஞ்சு வலியால் சாலையில் சரிந்து போராடிய இளைஞர் உயிரை வாகன சோதனையில் இருந்த போலீஸார் காப்பாற்றியுள்ளனர். துரைப்பாக்கம் போக்குவரத்து காவல் நிலைய உதவி ஆய்வாளர் மகேந்திரன் தலைமையில், தலைமைக் காவலர் சுப்பிரமணி, காவலர்கள் வேலாயுதம் மற்றும் கங்காதரன் ஆகியோர் துரைப்பாக்கம், ரேடியல் ரோடு சந்திப்பு அருகே கடந்த 6-ம் தேதி வாகனத் தணிக்கை மற்றும் போக்குவரத்து ஒழுங்குபடுத்தும் பணியில் ஈடுபட்டிருந்தனர்.

மதியம் 1 மணியளவில் சற்று தொலைவில் இருசக்கர வாகனத்தை ஓட்டி வந்த இளைஞர் ஒருவர் திடீரென தனது இருசக்கர வாகனத்தை நிறுத்தி, நெஞ்சைப் பிடித்தவாறு வாகனத்துடன் சாலையில் சரிந்து விழுந்தார். இதைக் கண்ட உதவி ஆய்வாளர் மகேந்திரன் மற்றும் காவலர்கள் ஓடிச் சென்று அவரை தூக்கியபோது, மூச்சுவிடுவதற்கு சிரமப்பட்டார்.