நீங்கள் எதிர்கொண்ட கடினமான பேட்ஸ்மேன் யார்..? அஸ்வின் பதில்

சென்னை,

இந்திய கிரிக்கெட் அணியின் முன்னணி சுழற்பந்து வீச்சாளர் தமிழகத்தை சேர்ந்த அஸ்வின் சர்வதேச கிரிக்கெட்டில் இருந்து கடந்த வருடம் விடைபெற்றார். டெஸ்டில் கும்பிளேவுக்கு (619 விக்கெட்) அடுத்தபடியாக அதிக விக்கெட் எடுத்த இந்தியர் என்ற பெருமைக்குரியவர். அத்துடன் 6 சதம், 14 அரைசதத்துடன் 3,503 ரன்களும் எடுத்துள்ளார். 116 ஒருநாள் போட்டியில் 156 விக்கெட்டும், 65 இருபது ஓவர் போட்டியில் 72 விக்கெட்டும் வீழ்த்தி இருக்கிறார். அப்படிப்பட்ட அவர் பார்டர் - கவாஸ்கர் கோப்பை தொடரின் பாதியிலேயே ஓய்வு அறிவித்தது பலருக்கும் ஆச்சரியமாக அமைந்தது.

இந்நிலையில் சமீபத்திய நிகழ்ச்சி ஒன்றில் அஸ்வினிடம், நீங்கள் எதிர்கொண்ட கடினமான பேட்ஸ்மேன் யார்? என்று கேள்வி கேட்கப்பட்டது. அதற்கு பதிலளித்த அஸ்வின் பேசுகையில், "நான் பந்து வீசியதிலேயே கடினமான பேட்ஸ்மேன் ஜோ ரூட்தான். அவர் சுழற்பந்து வீச்சுக்கு எதிராக சிறப்பாக செயல்படக் கூடியவர். அவரை ஆட்டமிழக்க வைப்பது கடினம்" என்று கூறினார்.