தீபாவளி முடிந்து சென்னை திரும்ப 3,827 பேருந்துகள் இயக்கம்

சென்னை: தீபாவளி பண்டிகையை கொண்டாட சொந்த ஊர் சென்றவர்கள் சென்னை திரும்ப ஏதுவாக, இன்று 3,827 பேருந்துகள் இயக்கப்படுகின்றன. இதேபோல, தமிழகத்தின் பிற முக்கிய நகரங்களில் இருந்து பல்வேறு இடங்களுக்கு 1,540 சிறப்பு பேருந்துகள் இயக்க ஏற்பாடு செய்யப்பட்டுள்ளது.

இதுதொடர்பாக போக்குவரத்து கழக அதிகாரிகள் கூறியதாவது: கல்வி, பணி, தொழில் நிமித்தமாக வெளியூர்களில் தங்கியிருப்போர், சொந்த ஊரில் தீபாவளி பண்டிகையை கொண்டாடும் வகையில், அரசு போக்குவரத்து கழகங்கள் சார்பில் சிறப்பு பேருந்துகள் இயக்கப்பட்டன. அதன்படி, தீபாவளிக்கு முந்தைய 3 நாட்களில் சென்னையில் இருந்து இயக்கப்பட்ட 10,784 பேருந்துகள் மூலமாக 5.76 லட்சம் பேர் சொந்த ஊருக்கு புறப்பட்டு சென்றனர்.